Башҡортостан Ҡытай менән хеҙмәттәшлек тураһында ике яҡлы килешеүҙәр әҙерләй

ӨФӨ, 2017 йыл, 15 май. /«Башинформ» мәғлүмәт агентлығы, Ғәлиә Нәбиева/. Башҡортостан Ҡытай менән сауҙа-иҡтисади, ғилми-техник һәм башҡа өлкәләрҙә хеҙмәттәшлек итеү тураһында ике яҡлы килешеүҙәргә ҡул ҡуйырға ниәтләй. Был хаҡта республика делегацияһының «Волга-Янцзы» форматындағы төбәк-ара хеҙмәттәшлек буйынса Советтың икенсе ултырышында ҡатнашыу йомғаҡтары буйынса билдәле булды.

Рәсәй Президентының Волга буйы федераль округындағы тулы хоҡуҡлы вәкиле урынбаҫары Алексей Сухов видеоконференция режимында Волга буйы федераль округы делегацияһының «Волга-Янцзы» форматындағы төбәк-ара хеҙмәттәшлек буйынса Советтың икенсе ултырышында ҡатнашыуына әҙерлекте тикшерҙе. Башҡортостан буйынса Баш федераль инспекторҙың матбуғат хеҙмәтендә хәбәр итеүҙәренсә, Совет 16 июндә Аньхой провинцияһының Хэфэй ҡалаһында йыйыла. Советтың рәйестәштәре — Рәсәй Президентының Волга буйы федераль округындағы тулы хоҡуҡлы вәкиле Михаил Бабич һәм Ҡытай Халыҡ Республикаһының Дәүләт советы ағзаһы Ян Цзечи. Рәсәй яғынан Совет эшендә Рәсәйҙең Сит ил эштәре, Иҡтисади үҫеш һәм Мәҙәниәт министрлыҡтары, Туризм буйынса федераль агентлыҡ вәкилдәре, шулай уҡ округ төбәктәренең ҙур вазифалы кешеләре ҡатнаша.

Хэфэй ҡалаһында Советтың икенсе ултырышы барышында Башҡортостан делегацияһы Аньхой, Сычуань, Цзянси провинцияларының халыҡ хөкүмәттәре һәм Ҡытай үҫеш банкы менән сауҙа-иҡтисади, ғилми-техник, инвестиция өлкәләрендә хеҙмәттәшлек тураһында килешеүҙәр төҙөргә ниәтләй.

Ошо уҡ осорҙа Рәсәй-Ҡытай Йәштәр форумын ябыу тантанаһы була, унда Башҡортостандан 10 студент ҡатнаша.