Сенаторҙар усаҡ яҡҡан өсөн штрафтарҙы миллион һумға тиклем арттырырға тәҡдим итә – киң мәғлүмәт саралары

ӨФӨ, 2017 йыл, 4 май. /«Башинформ» мәғлүмәт агентлығы, Ғәлиә Нәбиева/. Сенаторҙар усаҡ яҡҡан өсөн штрафтарҙы миллион һумға тиклем арттырырға тәҡдим итә. Парламентарийҙар урман янғындарының күпселеген халыҡтың яуапһыҙлығы һәм ғәмһеҙлеге менән бәйләй, тип хәбәр итә «РИА Новости».

«Парламентская газета» Федерация Советының Конституция ҡануниәте һәм дәүләт төҙөлөшө комитеты рәйесенең беренсе урынбаҫары Алексей Александровтың түбәндәге һүҙҙәрен килтерә: «Был мәсьәләләргә етдиерәк ҡарарға кәрәк. Дәүләт Думаһы депутаты булған саҡта һәм ҙур штраф һалыу өсөн сығыш яһағанда, бындай түләүҙәр кәрәкмәй, кешеләрҙең аҡсаһы юҡ, тип әйтә торғайнылар миңә. Ләкин мин башҡа уй-ниәттәр менән ошондай ҙур штрафтар тәҡдим итәм».

Әлеге көндә штрафтарҙың суммаһы бер кемде лә ҡурҡытмай, тип иҫәпләй халыҡ һайланыусылары. Янғын хәүефһеҙлеге ҡағиҙәләрен боҙоп, усаҡ яҡҡан өсөн граждандарға өс мең һумға тиклем штраф янай. Әгәр янғын сыҡһа, граждандар — биш мең, вазифалы кешеләр — 50 мең, ойошмалар 500 мең һумдан алып миллион һумғаса түләргә тейеш.

Киң мәғлүмәт саралары хәбәр итеүенсә, ике йыл элек сенаторҙар урмандарҙа янғын хәүефһеҙлеге ҡағиҙәләрен боҙған өсөн түләүҙәрҙе арттырыу тураһында закон проектын тәҡдим иткәйне, ләкин был башланғыс ҡаралманы.