Владимир Путин Башҡортостандың яңы эске эштәр министрын тәғәйенләне

ӨФӨ, 2017 йыл, 2 май. /«Башинформ» мәғлүмәт агентлығы, Ғәлиә Нәбиева/. Рәсәй Президенты полиция генерал-майоры Роман Викторович Деевты биләгән вазифаһынан бушатып, Башҡортостан Республикаһы буйынса эске эштәр министры итеп тәғәйенләне. 1 майҙа Владимир Путин тәғәйенләү тураһындағы указға ҡул ҡуйҙы. Ошо уҡ документ менән дәүләт башлығы полиция полковнигы Андрей Демидовты республиканың эске эштәр министры урынбаҫары – полиция етәксеһе итеп тәғәйенләне.

Белешмә. Роман Викторович Деев 1966 йылдың 8 сентябрендә Тамбов ҡалаһында тыуған. 1983 йылдан алып эске эштәр органдарында. 1987 йылда СССР Эске эштәр министрлығының Омск юғары милиция мәктәбен тамамлаған. 2001 йылдан Тамбов өлкәһе буйынса Эске эштәр идаралығы етәксеһе урынбаҫары – штаб етәксеһе. 2011 йылдың июнь айында Рәсәй Федерацияһы эске эштәр министрының бойороғо менән Тамбов өлкәһе буйынса Эске эштәр министрлығы идаралығы етәксеһе урынбаҫары вазифаһына билдәләнә. 2012 йылдың 30 сентябрендә Рәсәй Федерацияһы Президентының 1325-се указы менән Байкал аръяғы буйынса Эске эштәр министрлығы идаралығы етәксеһе итеп тәғәйенләнә. Дәүләт һәм ведомство наградалары менән бүләкләнгән.