Рәсәй Үҙәк һайлау комиссияһы Башҡортостандың яңы Үҙәк һайлау комиссияһына кандидаттарҙы билдәләне

ӨФӨ, 2017 йыл, 19 апрель. /«Башинформ» мәғлүмәт агентлығы, Ғәлиә Нәбиева/. Рәсәйҙең Үҙәк һайлау комиссияһы Башҡортостандың Үҙәк һайлау комиссияһы ағзалары итеп тәғәйенләү өсөн хәл иткес тауышҡа эйә кандидатураларҙы билдәләне. Рәсәйҙең Үҙәк һайлау комиссияһы республика Башлығына хәҙерге рәйес Хәйҙәр Вәлиевты яңы составтағы төбәк комиссияһы ағзаһы итеп тәғәйенләргә, Дәүләт Йыйылышына иһә ғәмәлдәге составтағы комиссия секретары Марина Долматованы тәҡдим итте.

Башҡортостанда төбәк Үҙәк һайлау комиссияһын төҙөү процедураһы бара. Яңы состав 2017 йылдың июнендә Үҙәк һайлау комиссияһы вәкәләттәренең ваҡыты үтеүгә бәйле һайлана. Һайлауҙар тураһында федераль һәм төбәк ҡануниәтенә ярашлы, яңы составтағы Үҙәк һайлау комиссияһына хәл иткес тауышҡа эйә 12 ағза инәсәк.

Республика һайлау комиссияһы ағзаларының яртыһын — Дәүләт Йыйылышы, икенсе яртыһын Башҡортостан Башлығы тәғәйенләй. Шуның менән бергә Дәүләт Йыйылышы ла, Башҡортостан Башлығы ла Рәсәйҙең Үҙәк һайлау комиссияһы тәҡдимдәре нигеҙендә һайлау комиссияһына берҙән дә кәм булмаған ағза тәғәйенләргә тейеш. Кандидатуралар буйынса тәҡдимдәр 3 майҙа тамамлана.

Белешмә. Башҡортостандың Үҙәк һайлау комиссияһында хәл иткес тауышҡа эйә 12 ағза иҫәпләнә. Комиссия кандидаттар исемлеген күрһәткән һәм Дәүләт Думаһында, Башҡортостандың Дәүләт Йыйылышында депутатлыҡ мандаттарын бүлеү рөхсәт ителгән сәйәси партияларҙың, шулай уҡ муниципаль берәмектәрҙең вәкиллекле органдары, бынан алдағы составтағы Үҙәк һайлау комиссияһы, Рәсәйҙең Үҙәк һайлау комиссияһы тәҡдимдәренә таянып, Дәүләт Йыйылышы һәм республика Башлығы тарафынан төҙөлә.