Башҡортостан закон сығарыусылары балаларҙың сәйәси ойошмаларын булдырыуға хоҡуҡты сикләү тәҡдимен индерҙе

ӨФӨ, 2017 йыл, 19 апрель. /«Башинформ» мәғлүмәт агентлығы, Ғәлиә Нәбиева/. Башҡортостандың Дәүләт Йыйылышы балаларҙың сәйәси ойошмаларын булдырыуға хоҡуҡты сикләгән закон сығарыу башланғысын әҙерләгән. Төбәк парламенты спикеры Константин Толкачев республиканың юғары уҡыу йорттары вәкилдәре менән осрашыуында ошо турала белдерҙе. Юғары мәктәп вәкилдәре студенттар араһында тәрбиәүи эш алып барыу мәсьәләләрен, ошо процеста йәмәғәт ойошмаларының ролен тикшерҙе. Парламент рәйесе балаларҙы һәм үҫмерҙәрҙе сәйәсиләштереүгә ҡырҡа ҡаршы булыуын билдәләне.

«Мәктәптәрҙә белем-тәрбиә биреү процесы сәйәсәттән алыҫ торорға тейеш, – тип иҫәпләй Константин Толкачев. – Уҡыусыларҙың һәм студенттарҙың төп бурысы – төрлө етәкселәрҙе яҡлау түгел, ә белем алыу».

Илһөйәрлек белем-тәрбиә биреү процесының нигеҙе булырға тейеш, тигән ышаныста Константин Толкачев. Йылдар үткәс һәр кем теге йәки был идеологияның өҫтөнлөгөн аңлай, үҙенең сәйәси ҡарашын, гражданлыҡ позицияһын формалаштыра һәм аңлы рәүештә һайлай ала.