Башҡортостан Башлығы ғәҙелһеҙлекте күрә һәм кешеләргә ярҙам итергә ынтыла – Нижегород өлкәһе губернаторы

ӨФӨ, 2017 йыл, 19 апрель. /«Башинформ» мәғлүмәт агентлығы, Ғәлиә Нәбиева /. Халыҡ менән аралашыу – төбәк башлығының иң мөһим эштәренең береһе. Кешеләрҙең йәшәйеше, уларҙың проблемалары һәм шатлыҡтары тураһында туранан-тура уларҙан белеү бик мөһим, тип аңлатма бирҙе Башҡортостан Башлығының Тура линияһы һөҙөмтәләренә Нижегород өлкәһе губернаторы Валерий Шанцев. «Һәр төбәк башлығы үҙенә уңайлы ысул табырға тейеш: кешеләр менән саралар барышында аралашыу, тура линиялар, блог йәки төбәк телеканалдарында һәм радиостанцияларында аҙналыҡ тура эфирҙар», — тип һөйләне губернатор «Башинформ» агентлығына.

Валерий Шанцев, үҙ тәжрибәһен иҫәпкә алып, кешеләр биргән һорауҙарҙың күпселеге муниципалитет компетенцияларына ҡарай: властың тап ошо кимәле кешегә яҡынараҡ, тип иҫәпләй. «Бына һеҙҙең тура линияла ла юл төҙөлөшө, төҙөкләндереү кеүек һорауҙар байтаҡ булды. Рөстәм Хәмитовтың «үҙ» һорауҙарына ғына түгел, республика Хөкүмәтенең компетенцияһына ҡарамаған һорауҙарға ла яуап биреүе уны тәү сиратта ғәҙелһеҙлекте күрә белгән һәм халыҡҡа ярҙам итергә ынтылған кеше, көслө ихтыярлы, профессиональ етәксе булараҡ күрһәтә», — тип йомғаҡ яһаны Нижегород өлкәһе губернаторы.