Үзбәкстандың Сәмәрҡәнд өлкәһе делегацияһы — Башҡортостанда

ӨФӨ, 2017 йыл, 16 март. /«Башинформ» мәғлүмәт агентлығы, Ғәлиә Нәбиева/. Үзбәкстандың Сәмәрҡәнд өлкәһе делегацияһы — эш сәфәре менән Башҡортостанда. Делегацияны Үзбәкстандың Рәсәйҙәге Ғәҙәттән тыш һәм Тулы хоҡуҡлы илсеһе Бахром Әшрәфханов оҙатыуында өлкә хакимы Химмәт Окбутаев етәкләй. Сәфәрҙең төп маҡсаты — Башҡортостан менән сауҙа-иҡтисади хеҙмәттәшлекте киңәйтеү, партнерҙар эҙләү, яҡтарҙың тышҡы сауҙа әйләнешен арттырыу, тип аңлатма бирҙе Рәсәй Сит ил эштәре министрлығының Өфөләге вәкиле Венер Ғәлиәкбәров.

Программала — Башҡортостан Хөкүмәте Премьер-министры менән осрашыу. Сәмәрҡәнд өлкәһенең һәм Башҡортостандың Сауҙа-сәнәғәт палаталары араһында хеҙмәттәшлек тураһындағы килешеүгә ҡул ҡуйыу, шулай уҡ B2B форматында һөйләшеүҙәр, бизнес берләшмәһе вәкилдәре менән осрашыу ҡаралған.

Сәфәр барышында Сәмәрҡәнд өлкәһе делегацияһы вәкилдәре XXVII «АгроКомплекс» халыҡ-ара күргәҙмәһенә, «Башҡортостан үҫеш корпорацияһы»на, «Өфө» индустриаль паркына барасаҡ.

Йома, 17 мартта, ҡунаҡтар «Башинком» фәнни-ғәмәлгә индереү предприятиеһы һәм «Башҡортостан нефть химияһы эшкәртеү институты» дәүләт унитар предприятиеһының эшмәкәрлеге менән танышасаҡ.

Рәсми сәфәр Башҡорт балы йортонда татлы аҙыҡты тәмләп ҡарау һәм «Үзбәкстан» сауҙа йортоноң эшмәкәрлеген баһалау менән тамамлана.