Рөстәм Хәмитов: «Йылдам үҫеш биләмәләре – яҡшы үҫеш катализаторҙары ул»

ӨФӨ, 2017 йыл, 16 март. /«Башинформ» мәғлүмәт агентлығы, Әлфиә Әғлиуллина/. Йылдам үҫеш биләмәләре – ошондай биләмәләрҙең өҫтөнлөктәрен аҡыллы итеп файҙаланғанда яҡшы үҫеш катализаторҙары ул, тип иҫәпләй Башҡортостан Башлығы Рөстәм Хәмитов. Ошо хаҡта ул «Эксперт-Урал» журналына интервьюһында һөйләне, Бәләбәй һәм Күмертау моноҡалаларының йылдам үҫеш биләмәләре статусын алыуына аңлатма биреп.

«Күмертауҙа көнбағыш эшкәртеү менән шөғөлләнеүсе яңы ҙур компания асылды. Планда – алты-ете миллиард һумлыҡ инвестициялар. Бәләбәйҙең дә мөмкинлектәре һәйбәт: унда сыр ҡайнатыу сәнәғәте һәм машина эшләү үҫешәсәк»,— тип билдәләне төбәк Башлығы. — «Рәсәй вертолеттары» урындағы ташламалар менән файҙаланыу өсөн Күмертауҙа йылдам үҫеш биләмәләре сиктәрендә өҫтәмә продукциялар сығарыу мөмкинлеген өйрәнә. Был ҙур корпорация, ул етештереүҙе күсерә генә түгел, яңыны ла төҙөй ала. Бәләбәй ҡалаһындағы «Автонормаль» компанияһы автомобиль сәнәғәте өсөн нығытыу изделиеларын сығарыу менән шөғөлләнә. Бәләбәйҙәге ҡайһы бер йылдам үҫеш биләмәләре резиденттарының да автосәнәғәт менән бәйле буласағы аңлашыла».

Рөстәм Хәмитов әйтеүенсә, Башҡортостан өсөн йылдам үҫеш биләмәләре – тотош ил өсөн дә яңы тәжрибә.