Башҡортостанға Көньяҡ Африка Республикаһы илселеге делегацияһы килде

ӨФӨ, 2017 йыл, 13 март. /«Башинформ» мәғлүмәт агентлығы, Ғәлиә Нәбиева/. Башҡортостанға Көньяҡ Африка Республикаһы илселеге делегацияһы килде. Делегация составында Көньяҡ Африка Республикаһының Рәсәйҙәге илселегендәге сәйәсәт бүлеге советнигы Тандо Даламба һәм илселектәге сәйәсәт бүлегенең беренсе секретары Офани Персиваал Сенгани бар. Рәсми осрашыуҙар барышында Көньяҡ Африка Республикаһы илсеһенең Башҡортостанға сәфәренең аспекттары тикшерелә, тип аңлатма бирҙе Рәсәй Сит ил эштәре министрлығының Өфөләге вәкиле Венер Ғәлиәкбәров.

Бөгөн төбәктәге юғары уҡыу йорттарының халыҡ-ара бәйләнештәр идаралыҡтары вәкилдәре менән осрашыу була. Һуңынан дипломаттар Башҡортостан Башлығының Протокол идаралығы, Рәсәй Сит ил эштәре министрлығының Өфөләге вәкиллеге, Башҡортостандың Иҡтисади үҫеш министрлығы, Башҡортостандың Эшҡыуарлыҡ һәм туризм буйынса дәүләт комитеты, республиканың Сауҙа-сәнәғәт палатаһы вәкилдәре менән программаны тикшерә.

Көндөң икенсе яртыһында «Башҡортостан ҡатын-ҡыҙҙар союзы» һәм «Рәсәй әсәләре» йәмәғәт хәрәкәте вәкилдәре менән аралашыу ҡаралған.

Шишәмбе көндө ҡунаҡтар Өфөнөң иҫтәлекле урындары менән таныша ала һәм XXVII «Агрокомплекс» халыҡ-ара күргәҙмәһен асыуҙа ҡатнаша.