Баш ҡалала берҙәм баҡсасылар ойошмаһы булдырыласаҡ

ӨФӨ, 2017 йыл, 7 март. /«Башинформ» мәғлүмәт агентлығы, Ғәлиә Нәбиева/. Өфөлә ҡалала берҙәм баҡсасылыҡ ойошмаһын булдырыу хаҡында тәҡдим ҡарала. Ҡала Советы рәйесе Валерий Трофимов хәбәр итеүенсә, май айында депутаттар корпусы баҡса ширҡәте мәсьәләләре буйынса киң ведомство-ара кәңәшмә уҙғарырға ниәтләнә.

Депутаттарҙың фекере буйынса, был өлкәлә проблемалар етерлек. Күп кенә баҡсасылар әле һаман үҙ участкаларын рәсмиләштерә алмай, сөнки улар һыу һаҡлау зонаһында урынлашҡан. Шул рәүешле рәсмиләштереү өсөн ҡаршылыҡтар күбеһенсә ҡануниәттең һәм норматив акттарҙың еренә еткереп эшләнмәүендә тора. Бер төркөм баҡса ширҡәтендә электр менән тәьмин итеү мәсьәләләре бар. Ҡайһы бер баҡсасылар үҙҙәренең идара итеүсе компанияларын ойошторорға теләй.

«Әлеге ваҡытта был өлкәлә берҙәмлек юҡ. Өфөлә Баҡсасылар ассоциацияһы, союзы эшләй. Тағы ла бәләкәйерәк берекмәләр бар. Уларҙың ҡайһы берәүҙәре әүҙем эшләй, икенселәре ҡағыҙҙа ғына. Һәр береһе тарҡау эш итә. Был дөрөҫ түгел, — тип билдәләне Валерий Трофимов. — Аныҡ позициялары менән бер ойошма булырға тейеш, ул ҡала баҡсасылары исеменән дәүләт власы һәм урындағы үҙидара органдары менән диалог алып барасаҡ».