3 мартта Башҡортостанға Михаил Бабич килә

ӨФӨ, 2017 йыл, 3 март. /«Башинформ» мәғлүмәт агентлығы, Ғәлиә Нәбиева/. 3 мартта Рәсәй Президентының Волга буйы федераль округындағы тулы хоҡуҡлы вәкиле Михаил Бабич эш сәфәре менән Башҡортостанға килә. Өфөлә Михаил Бабич Урындағы үҙидараны үҫтереү буйынса округ консультатив советы ултырышын уҙғара. Уның барышында урындағы әһәмиәттәге (шул иҫәптән, төҙөкләндереү һәм йәшәү өсөн заманса уңайлы мөхит булдырыу) мәсьәләләрҙе хәл иткәндә граждандар йәмғиәте институттары һәм халыҡ менән үҙ-ара килешеп эш итеү буйынса урындағы үҙидара органдарының эшмәкәрлек мәсьәләләрен тикшереү күҙаллана.

Баш федераль инспекторҙың матбуғат хеҙмәтендә хәбәр итеүҙәренсә, Рәсәй Президентының Волга буйы федераль округындағы тулы хоҡуҡлы вәкиле Башҡортостан энергия системаһының хәҙерге заман тарихында иң ҙур инвестиция проекттарының береһе булған, төҙөлөп ятҡан Затон йылылыҡ электр үҙәген ҡараясаҡ. «Уңайлы ҡала мөхитен булдырыу» проектын тормошҡа ашырыу сиктәрендә Михаил Бабич йорт биләмәһен төҙөкләндереү буйынса Өфөләге күп фатирлы йорттарҙың береһенән килгән башланғыс менән танышасаҡ.