Константин Толкачев Рәсәй исеменән Афинала Европа Советы комитеты ултырышында ҡатнаша

ӨФӨ, 2017 йыл, 16 февраль. /«Башинформ» мәғлүмәт агентлығы, Әлим Фәйезов/. Башҡортостан Дәүләт Йыйылышы Рәйесе Константин Толкачев Грецияның баш ҡалаһы Афинала мониторинг буйынса Европа Советының урындағы һәм төбәк властары конгресы комитеты ултырышында ҡатнаша. Ултырышта Европа Советы ағзалары булған илдәрҙә урындағы һәм төбәк кимәлендә демократияның торошо буйынса конгресс документтарын ҡарау күҙаллана.

Константин Толкачев ингән өс устав комитеттарының береһе, Мониторинг буйынса комитет, урындағы үҙидараның Европа хартияһын үтәүен баһалау, Европала урындағы һәм төбәк демократияһы торошо тураһында докладтар әҙерләү һәм ағза булып торған илдәрҙә урындағы һәм төбәк демократияһына ҡағылышлы айырым мәсьәләләрҙе күҙәтеү менән шөғөлләнә.

«Ултырыштың көн тәртибенә индерелгән мәсьәләләр граждандарҙың хоҡуғына һәм иркенә ҡағыла. Эстония буйынса мәсьәләне айырым ҡарау күҙаллана, унда рус телле халыҡтың хоҡуҡтарын ҡыҫыу күҙәтелә. Һүҙ Европаның төрлө төбәктәрендә демократияны үҫтереү хаҡында бара. Совет составына 46 илдең вәкилдәре инә. Беҙҙең алда айырым биләмәләрҙә Европа норматив акттары үтәлешенең сифатын тикшереү бурысы тора», — тине Константин Толкачев, ултырышта ҡатнашыуына аңлатма биреп.