Өфөлә республиканың яңы баш суд приставы Илнур Мәхмүтов менән таныштырҙылар

ӨФӨ, 2017 йыл, 25 ғинуар. /«Башинформ» мәғлүмәт агентлығы, Александр Смирнов/. 24 ғинуарҙа Республика йортонда Башҡортостан Башлығы Рөстәм Хәмитов Суд приставтары федераль хеҙмәте директоры урынбаҫары – Рәсәйҙең баш суд приставы урынбаҫары Рөстәм Степаненко менән осрашты. Яҡтар төбәктең Суд приставтары федераль хеҙмәтенең территориаль органы менән үҙ-ара хеҙмәттәшлек итеү мәсьәләләрен тикшерҙе.

Осрашыу барышында Рөстәм Степаненко Суд приставтары федераль хеҙмәтенең Башҡортостандағы идаралығы етәксеһе – Башҡортостандың баш суд приставы Илнур Мәхмүтов менән таныштырҙы.

- Илнур Әнүәр улы ябай приставтан алып Мари Иле һәм Удмурт республикалары буйынса идаралыҡ етәкселәренә тиклем бөтә вазифаларҙы үткән. Хәҙер Башҡортостандағы идаралыҡты етәкләр өсөн тыуған төйәгенә ҡайтҡан. Бик ҙур эш тәжрибәһенә эйә булған белемле, әҙерлекле хеҙмәткәр, – тине Рөстәм Степаненко. – Зариф Закир улы Байғусҡаров уға бик яҡшы, эшкә һәләтле коллектив ҡалдырҙы. Был коллектив беҙҙең территориаль органдар араһында яҡшы иҫәптә тора. Уҙған йылдың эш һөҙөмтәләре бик һәйбәт. 11,5 миллиард һум түләтелгән, уларҙан 4,5 миллиард һум самаһы – төрлө кимәлдәге бюджеттарға, 1 миллиард самаһы – республика ҡаҙнаһына һәм урындағы бюджетҡа.

– Республика буйынса идаралыҡ алдынғы урындарҙа тора. Шуға ҡарамаҫтан, бында эш күп. Барыһы ла яҡшы тигән ҡарашта булырға һәм эште шул уҡ кимәлдә ҡалдырырға ярамай. Бушаҡ урындар барлығын да беләһегеҙ. Улар менән шөғөлләнергә, тейешле эштәр алып барырға кәрәк, – тип билдәләне Рөстәм Хәмитов. – Ҡатмарлы осраҡтар, ҡайһы берҙә хәл ителмәҫ кеүек күренгәндәре килеп тыуғанда ла бергәләп, һәйбәт итеп эшләргә тейешбеҙ, сөнки берҙәм булғанда ғына төрлө ауырлыҡтарҙан сығыу юлын табабыҙ.