Республикалағы йәш ғаиләләр торлаҡ һатып алыу өсөн 175 миллион һумдан ашыу аҡса аласаҡ

ӨФӨ, 2017 йыл, 24 ғинуар. /«Башинформ» мәғлүмәт агентлығы, Ғәлиә Нәбиева/. Башҡортостан йәш ғаиләләргә торлаҡ һатып алыуға (төҙөүгә) социаль түләүҙәр өсөн 175 миллион һумдан ашыу субсидия аласаҡ. Тейешле бойороҡ Министрҙар Кабинеты сайтында баҫылған. Аҡса «Рәсәй Федерацияһы граждандарын арзан, уңайлы торлаҡ һәм коммуналь хеҙмәттәр менән тәьмин итеү» дәүләт программаһына ярашлы бүленә. 4,234 миллиард һум аҡса илдең 75 субъекты араһында бүленгән.

Субсидиялар 2015-2020 йылдарға иҫәпләнгән «Торлаҡ» маҡсатлы федераль программаһының «Йәш ғаиләләрҙе торлаҡ менән тәьмин итеү» ярҙамсы программаһы нигеҙендә бирелә. Ярҙамсы программала торлаҡ шарттарын яҡшыртыуға мохтаж йәш ғаиләләргә торлаҡ һатып алыу йәки төҙөү өсөн социаль түләүҙәр биреү ҡаралған. Торлаҡ хаҡының бер өлөшөн финанслау күләме балаһыҙ ғаиләләргә — 30 процент, балалылар өсөн 35 процент тәшкил итә.

Субсидиялар ярҙамсы программаның шарттарын һәм талаптарын үтәгән, 2017 йылда ошо программала ҡатнашыуға ғариза биргән төбәктәргә тапшырыла.