Башҡортостанда йылдан-йыл инвалид балалар һаны арта

ӨФӨ, 2017 йыл, 12 ғинуар./«Башинформ» мәғлүмәт агентлығы, Арина Рәхимҡолова/. Башҡортостанда зәғиф балалар һаны йылдан-йыл 500 кешегә арта. Ошо хаҡта республиканың хеҙмәт һәм халыҡты социаль яҡлау министры урынбаҫары Юрий Мельников Башҡортостан Дәүләт Йыйылышының Һаулыҡ һаҡлау, социаль сәйәсәт һәм ветерандар эштәре буйынса комитеты ултырышында хәбәр итте. Республиканың Хеҙмәт министрлығы инвалидтарға социаль ярҙамды көсәйтергә тәҡдим итеүсе закон проекты әҙерләгән.

Министр урынбаҫары һөйләүенсә, 1 ғинуарға ҡарата алынған мәғлүмәттәргә ярашлы, Башҡортостанда 300 меңгә яҡын мөмкинлектәре сикләнгән кеше йәшәй. Шул уҡ ваҡытта, уның әйтеүе буйынса, уларҙың иҫәбе кәмеү яҡҡа бара. Был граждандар категорияһы дөйөм республика халҡының 7,2 процентын тәшкил итә, ул Рәсәйгә ҡарағанда түбәнерәк. Ғәриптәр араһында ике процент самаһы – коляскалағы инвалидтар, 2,2 проценты – ишетеү һәләте буйынса, 4,5 проценты – күреү һәләте буйынса инвалидтар. Тап ошо категорияларға, Юрий Мельниковтың әйтеүе буйынса, тәү сиратта уңайлы мөхит шарттары булдырыу мөһим. Шуның менән бәйле республиканың Хеҙмәт министрлығы тарафынан инвалидтарға социаль ярҙам күрһәтеү тураһындағы законға һәм башҡа бер төркөм норматив акттарға үҙгәрештәр индереүҙе тәҡдим итеүсе закон проекты әҙерләнгән. Оҡшаш документ федераль кимәлдә Рәсәй Хөкүмәте Премьер-министры Дмитрий Медведев ҡушыуы буйынса әҙерләнгән.

Комитет тарафынан хуплау тапҡан һәм Башҡортостан Дәүләт Йыйылышының яҡындағы пленар ултырышында тәүге уҡыуҙа тикшереләсәк закон проекты республика биләмәһендә инвалидтарҙың төрлө йәшәйеш объекттары һәм хеҙмәттәре менән ҡаршылыҡһыҙ ҡулланыу шарттары булдырыуға йүнәлтелгән. Был проектты тормошҡа ашырыуға төбәк бюджетынан өҫтәмә саралар талап ителмәйәсәк.