Төбәктең нефть һәм химия кластеры федераль ҡаҙнанан 140 миллион һум аҡса аласаҡ

ӨФӨ, 2016 йыл, 9 декабрь. /«Башинформ» мәғлүмәт агентлығы, Арина Рәхимҡолова/. Рәсәй Хөкүмәте 11 инновация кластерын һайлап алды. Улар иҫәбендә Башҡортостандың нефть һәм химия кластеры ла бар. Ул республикалағы 160 предприятиены үҙ эсенә ала. 2017 йылда уға ярҙам итеүгә федераль бюджеттан яҡынса 140 миллион, 2018 йылда иһә 500 миллион һум аҡса йүнәлтеү күҙаллана. Был хаҡта Башҡортостан Башлығы Рөстәм Хәмитов хәбәр итте, республика Дәүләт Йыйылышына йыллыҡ Мөрәжәғәтнамә менән сығыш яһап.

Рөстәм Хәмитов һүҙҙәренсә, 2020 йылдың аҙағына кластерҙы үҫтереүгә бюджеттан тыш сығанаҡтарҙан яҡынса 30 миллиард һум бүленергә тейеш. Ошо арҡала предприятиеларҙа хеҙмәт етештереүсәнлеге 20 проценттан ашыуға, патенттар һаны өс тапҡырға артасаҡ. Йыл һайын 30-ҙан ашыу технологик стартаптың эшләй башлауы күҙаллана.

Етештереүҙе үҙгәртеү, продукция төрҙәрен киңәйтеү, илебеҙ технологияларын ҡулланып аҙ тоннажлы химияны үҫтереү, тәбиғәтте һаҡлау эшмәкәрлегенең сифатын күтәреү нефть һәм химия тармағының төп бурыстары булып тора, тип билдәләне Башҡортостан Башлығы.

Кластерҙы үҫтереү буйынса мәсьәләләрҙе хәл итеү менән махсус офис шөғөлләнергә тейеш, тип һыҙыҡ өҫтөнә алды республика етәксеһе. Уны ойоштороу Башҡортостан Хөкүмәтенә йөкмәтелде.