Башҡортостанда социаль хеҙмәттәр алыу өсөн килемдең сикке күләме артты

ӨФӨ, 2016 йыл, 30 ноябрь. /«Башинформ» мәғлүмәт агентлығы, Арина Рәхимҡолова/. Башҡортостанда социаль хеҙмәттәргә мохтаждар өсөн килемдең сикке күләме билдәләнде. 2017 йылда ошо хеҙмәттәр уртаса килем 14 044,5 һум (249 һумға күберәк) булған осраҡта күрһәтелә. Пенсионер өсөн сумма 10 750,5 һум (195 һумға күберәк) тәшкил итәсәк. 30 ноябрҙә республика Дәүләт Йыйылышының пленар ултырышында тейешле закон проекты тәүге уҡыуҙа ҡабул ителде.

Башҡортостандың хеҙмәт һәм халыҡты социаль яҡлау министры Ленара Иванова билдәләүенсә, бушлай социаль хеҙмәттәр күрһәтеү өсөн йән башына уртаса килем төбәктә билдәләнгән йәшәү минимумының бер ярым дәүмәленән кәм була алмай. 2016 йылдың икенсе кварталында республикала эшкә һәләтле халыҡ өсөн йәшәү минимумы — 9363, пенсионерҙарға 7167 һум тәшкил иткән.

Закон төбәк бюджетында халыҡты социаль хеҙмәтләндереү өсөн ҡаралған 2032,3 миллион һум аҡса иҫәбенә тормошҡа ашырыла.