Башҡортостанда дачаһы булған күп балалы ғаиләләргә бушлай ер бирелмәй

ӨФӨ, 2016 йыл, 27 октябрь. /«Башинформ» мәғлүмәт агентлығы, Арина Рәхимҡолова/. Башҡортостан Дәүләт Йыйылышы депутаттары ҡайһы бер сәбәптәр буйынса күп балалы һәм аҙ тәьмин ителгән ғаиләләргә бушлай ер участкаларын бүлеүҙе тыйған закон проектын ҡараны. Мәҫәлән, әгәр ғаиләнең баҡсаһы бар икән, ул бушлай ер алыуға дәғүә итә алмай. Законға үҙгәрештәр 27 октябрҙә республика парламентының пленар ултырышында тәүге уҡыуҙа ҡабул ителде.

Башҡортостан ер һәм мөлкәт мөнәсәбәттәре министрының беренсе урынбаҫары Альмир Ғәзизов әйтеүенсә, «ғәмәлдәге ҡануниәт инвалид бала тәрбиәләгән, аҙ тәьмин ителгән, йәш һәм күп балалы ғаиләләргә йорт төҙөү өсөн бушлай ер алыуға хоҡуҡ бирә».

Ағымдағы йылдың 1 октябренә бирелгән мәғлүмәттәр буйынса, республикалағы 78 меңдән ашыу ғаилә участка алыу өсөн мөрәжәғәт иткән. Уларҙың 42 меңдән ашыуы – күп балалы. Яртыһынан ашыуы ерле булған. Тағы ла 37 мең мохтаж ғаилә сиратта тора.

Башҡортостан Волга буйы федераль округы төбәктәре араһында күп балалы ғаиләләр һаны буйынса беренсе һәм бушлай ер алыусылар буйынса етенсе урында килә. Шуға ҡарамаҫтан, закон проекты торлаҡ төҙөү өсөн участкалары булғандарҙан бушлай ергә хоҡуғын алырға тәҡдим итә. Шулай итеп, дачаһы булған ғаиләләргә льгота бирелмәй. Был 2017 йылдың 1 ғинуарынан сиратҡа баҫҡандарға ғына ҡағыла.

Министр урынбаҫары депутаттарҙың һорауҙарына яуап биреп, күрше Татарстанда бындай сикләүҙәр индерелмәүен билдәләне.