Башҡортостан вәкилдәре «Башнефть» компанияһының Директорҙар советы составына инәсәк — Рөстәм Хәмитов

ӨФӨ, 2016 йыл, 21 октябрь. /«Башинформ» мәғлүмәт агентлығы, Галина Бахшиева/. Башҡортостан Башлығы Рөстәм Хәмитов 19 октябрҙә эшлекле осрашыу барышында «Роснефть» етәксеһе Игорь Сечиндың «Башнефть» компанияһының Директорҙар советы составына инергә тәҡдим итеүенә аңлатма бирҙе. Рәсәй энергетика форумы барышында уҙған брифингта Рөстәм Хәмитов ысынлап та ошондай тәҡдим алыуын һәм әле уны ҡарауын раҫланы.

«Башнефть» компанияһында оптималләштереү булһа, ул компания эшенең иҡтисади һөҙөмтәлелеген арттырыуға йүнәлтелер, тип ышанам. Минеңсә, һанды кәметеүҙәре икеле. Оптималләштереү мөмкинлектәре һайланған», — тине республика Башлығы. — «Роснефть» менән үҙ-ара эш итеүгә килгәндә, донъяның ҙур нефть компанияһының республикаға килеүе хаҡында бер нисә тапҡыр әйттем. Был беҙҙең өсөн бик мөһим, һәм беҙ яҡшы һөҙөмтә алырға теләйбеҙ. «Роснефть» «Башнефть» компанияһының һәйбәт һәм әүҙем эшләүе менән ҡыҙыҡһына. Беҙ берлектә идара итеү тураһында һүҙ алып барабыҙ. Республикабыҙ вәкилдәре Директорҙар советына инәсәк. Декабрь айында берлектә идара итеү буйынса шарттар яҙылған килешеүгә ҡул ҡуйырға тейешбеҙ», — тине Рөстәм Хәмитов.

«Башнефть» компанияһы акционерҙарының сираттан тыш йыйылышы 16 декабргә билдәләнгән.