Муниципалитеттарҙың һайлауҙарҙа веб-трансляцияларға әҙерлеге тикшерелде

Башҡортостандың бөтә һайлау участкаларындағы веб-камералар ҡәтғи билдәләнгән ваҡытта ҡуйылып бөтәсәк. Бөгөн Республика Йортонда үткән селектор кәңәшмәһендә муниципалитеттарҙың 2012 йылдың 4 мартындағы һайлауҙарҙа видеотрансляция ойоштороуға әҙерлеге тураһында һөйләнеләр. Уны вице-премьер, БР сәнәғәт һәм инновацион сәйәсәт министры Марат Мөлөков үткәрҙе. БР Үҙәк һайлау комиссияһы рәйесе Хәйҙәр Вәлиев һәм тауыш биреүҙе техник яҡтан тәьмин итеүгә яуаплы предприятиеның — «Башинформсвязь» асыҡ акционерҙар йәмғиәтенең генераль директоры Рөстәм Сафиев отчет бирҙе. Бөтә район һәм ҡалаларҙың хакимиәттәре Өфө менән видеобәйләнештә булды.

Хәйҙәр Вәлиев әйтеүенсә, һайлау көнөндә Башҡортостанда йәмғеһе 3509 участка һайлау комиссияһы һәм 69 территориаль һайлау комиссияһы эшләйәсәк. Федераль кимәлдә һайлаусылар ваҡытлыса йәшәгән участка һайлау комиссияларында (дауаханаларҙа, изоляторҙарҙа һәм башҡаларҙа) тура трансляциялар ойоштормаҫҡа ҡарар итеүҙәре арҡаһында, ә республикала бындай 41 участка бар, веб-камералар 3537 һайлау комиссияһында ҡуйыласаҡ.

Хәйҙәр Вәлиевтың билдәләүенсә, әлеге ваҡытта һәр бинала трансляциялар ойоштороу өсөн комплекттар урынлаштырыу схемалары, урна һәм кабиналарҙың ҡайҙа ҡуйыласағы, комиссия ағзалары ултырасаҡ урындар билдәләнгән.

— Бөгөнгө көндә видеотрансляция системаһына 822 участка тоташтырылды, — тип хәбәр итте Рөстәм Сафиев һәм, һәр һайлау участкаһындағы эштәр вандалдарҙан һаҡлаусы шкафтағы программа-аппарат комплексын һәм ике веб-камераны ҡуйыуҙан ғибәрәт, тип аңлатып үтте.

Уның әйтеүенсә, әлеге мәлдә Башҡортостанға барлыҡ программа-аппарат комплекстары ла ҡайтарылып бөткән, вандалдарҙан һаҡлаусы шкафтар һәм камераларҙы тоташтырыу өсөн кабелдәр ҙә ошо арала килтереләсәк. Үҙ бурыстарын элемтәселәр билдәләнгән ваҡытҡа – 15 февралгә тиклем теүәлләйәсәк, тип ышандырҙы Рөстәм Сафиев һәм, 26 февралгә бөтә Рәсәй буйынса системаны һынау планлаштырылған, тип билдәләне.