Өфө мэры вазифаһына имтихан ваҡытында «жучок» табылған

Башҡортостан Республикаһы Президенты ҡарамағындағы Башҡортостан дәүләт хеҙмәте һәм идара итеү академияһында үткән Өфө ҡалаһы башлығы вазифаһына имтихан барышында «жучок» табылған. Был турала журналистарға имтихан ҡабул итеү буйынса эксперт комиссияһы рәйесе, Башҡортостан дәүләт хеҙмәте һәм идара итеү академияһы ректоры Сергей Лаврентьев хәбәр итте.

— Креслоларҙың береһендә авторучкаға оҡшаған предмет табылды, — тине ул. — Уның аудио- һәм видеояҙма менән тәьмин ителгәнлеге асыланды. Тейешле акт тултырҙыҡ һәм уны протоколға беркеттек. Бының менән тейешле органдар шөғөлләнәсәк.

Сергей Лаврентьев йәшерен күҙәтеү ҡорамалының кем менән ҡалдырылыуына бәйле фекерҙәрен әйтмәне. Шулай ҙа ҡорамалдың имтихан алдынан ҡала башлығы вазифаһына кандидаттар ултырған креслоларҙың береһендә табылыуын йәшермәне.