Рөстәм Хәмитов Рәсәй Президентының Волга буйы федераль округындағы тулы хоҡуҡлы вәкиле ҡарамағындағы Совет ултырышында ҡатнашты

9 декабрҙә Йошкар-Ола ҡалаһында (Марий Иле Республикаһы) Башҡортостан Президенты Рөстәм Хәмитов «Волга буйы федераль округы төбәктәрендә йәмәғәт хәүефһеҙлеген тәьмин итеү тураһында» мәсьәләһе буйынса Рәсәй Президентының Волга буйы федераль округындағы тулы хоҡуҡлы вәкиле ҡарамағындағы Совет ултырышында ҡатнашты, тип хәбәр иттеләр төбәк башлығының матбуғат хеҙмәтенән.

Ултырыш ил башлығының Волга буйы федераль округындағы тулы хоҡуҡлы вәкиле Григорий Рапота рәйеслегендә үтте. Унда шулай уҡ Совет ағзалары – төбәк губернаторҙары, баш федераль инспекторҙар, федераль һәм төбәк министрлыҡтар һәм ведомстволар вәкилдәре ҡатнашты.

Кәңәшмә башында Григорий Рапота социологик тикшеренеүҙәр мәғлүмәттәре менән таныштырҙы, уларға ярашлы Рәсәйҙә йәшәгән һорау алыуҙа ҡатнашыусыларҙың 49,9 проценты урамда үҙҙәрен тулыһынса яҡланған тип һанамай, 40 проценттан ашыуы – хоҡуҡ һаҡлау органдары эшен кире баһалай. Тулы хоҡуҡлы вәкил һүҙҙәренсә, был хәлде үҙгәртергә кәрәк һәм бының өсөн, тәү сиратта, йәмәғәт хәүефһеҙлеген тәьмин итеүгә мөнәсәбәтте ҡырҡа үҙгәртеү зарур.