Рәсми делегация Төркиәгә сәфәргә сыҡты

Бөгөн иртә менән ТӨРКСОЙ Халыҡ-ара ойошмаһы саҡырыуы буйынса Башҡортостандың рәсми делегацияһы күренекле сәйәси һәм йәмәғәт эшмәкәре, ғалим-төркиәтсе Әхмәт-Зәки Вәлидиҙең тыуыуына 120 йыл тулыуға арналған сараларҙа ҡатнашыу өсөн Төркиәгә осто. БР Хөкүмәте Премьер-министры урынбаҫары Зөһрә Рәхмәтуллина етәкселегендәге Башҡортостан делегацияһы көндөң икенсе яртыһында Төркиә баш ҡалаһы Анкараның Кечиорен районында урынлашҡан Ә.-З. Вәлиди Туған исемендәге паркты асыуҙа ҡатнашасаҡ.

Шул уҡ көндө икенсе Халыҡ-ара Рамазан фольклор фестивале сиктәрендә республика сәнғәт оҫталарының концерты үткәреләсәк.

Сәфәр программаһы менән Төркиәнең мәҙәниәт министры Эртугрул Гюнай, ТӨРКСОЙ-ҙың генераль секретары Дюсен Касеинов, Кечиорен районы хакимиәте вәкилдәре, Төркиә Республикаһының башҡа дәүләт һәм йәмәғәт эшмәкәрҙәре менән осрашыуҙар планлаштырылған.

Мәғлүм булыуынса, 2010 йыл ТӨРКСОЙ сиктәрендә Әхмәт-Зәки Вәлиди Туған йылы итеп иғлан ителде. Бындай ҡарар былтыр йыл аҙағында төрки телле илдәрҙең мәҙәниәт министрҙары Советы тарафынан ҡабул ителде.

Был Халыҡ-ара төрки мәҙәниәт ойошмаһы сиктәрендә иғлан ителгән тәүге исемле йыл.