Дәүләт Думаһы ҡарамағындағы Йәштәр йәмәғәт палатаһы ултырышы

24-25 июндә Мәскәүҙә Дәүләт Думаһы ҡарамағындағы Йәштәр Йәмәғәт палатаһы ултырышы үткәрелә. Башҡортостандан унда БР Дәүләт Йыйылышы-Ҡоролтай ҡарамағындағы Йәштәр йәмәғәт палатаһы рәйесе Руслан Ғизәтуллин ҡатнаша.

Йәштәр йәмәғәт палатаһы 2011-2015 йылдарға «Рәсәй йәштәре» федераль маҡсатлы программаһы концепцияһын, шулай уҡ ҡайһы бер федераль закондар проекттарын тикшерәсәк. Закон проекттарының береһе — «Мәғариф тураһында» Рәсәй Федерацияһы Законына үҙгәрештәр индереү тураһында» — буйынса Руслан Ғизәтуллин сығыш яһаясаҡ, тип көтөлә. Башҡортостандың Йәштәр йәмәғәт палатаһы был законға студенттар төҙөлөш отрядтары эшмәкәрлегенә ҡағылышлы үҙгәрештәр индерергә тәҡдим итергә йыйына.

Ултырыш сиктәрендә Рәсәй Йәштәр парламент хәрәкәтенең берҙәм порталында Йәштәр йәмәғәт палатаһының рәсми сайтын (www.newparlament.ru) презентациялаясаҡтар. Шулай уҡ Йәштәр палатаһы ағзалары Рәсәйҙә йәштәр парламентаризмын үҫтереү буйынса Берҙәм эш итеү көнөн тикшерәсәк, уны киң мәғлүмәт саралары вәкилдәре өсөн матбуғат конференциялары форматында Рәсәй төбәктәрендә үткәрергә планлаштырыла. Был матбуғат конференцияларында төбәк йәштәр парламент структуралары һәм Рәсәй Йәштәр парламент хәрәкәтенең Берҙәм порталы менән таныштырыу күҙаллана.