Бөтә донъя башҡорттары ҡоролтайының күсмә ултырышы Мәсетле районында үтә

Мәсетле районы үҙәге — Оло Ыҡтамаҡ ауылында бөгөн Бөтә донъя башҡорттары ҡоролтайы Башҡарма комитеты Советының күсмә ултырышы үтә. Унда Башҡортостандың төньяҡ-көнсығышы – Ҡариҙел, Салауат, Балаҡатай, Дыуан, Ҡыйғы райондары хакимиәт башлыҡтарының социаль мәсьәләләр буйынса урынбаҫарҙары, башҡорттар ҡоролтайҙары рәйестәре, шулай уҡ Свердловск һәм Силәбе өлкәләренең башҡорттар ҡоролтайҙары рәйестәре ҡатнаша. Советтың күсмә ултырышына шулай уҡ ғалимдар һәм крайҙы өйрәнеүселәр саҡырылған. Ултырышты Бөтә донъя башҡорттары ҡоролтайы Башҡарма комитеты рәйесе Азамат Ғәлин үткәрә.

Ултырышта ҡатнашыусылар III бөтә донъя башҡорттары ҡоролтайына, Бөтә Рәсәй халыҡ иҫәбен алыуға әҙерлек мәсьәләләрен, шулай уҡ Башҡортостан Республикаһының тәбиғи һәм тарихи ҡомартҡыларын һаҡлауға, башҡорт халҡының күренекле эшмәкәрҙәре иҫтәлеген мәңгеләштереүгә ҡағылышлы проблемаларҙы тикшерәсәк.