Монголияның һәр икенсе бал ҡорто - Башҡортостандан

Монголия Башҡортостандан тәүге 600 бал ҡорто пакетын һәм 150 инә бал ҡортон көтә. Күгәрсен һәм Ейәнсура райондарында тупланған был ҡиммәтле йөк бөгөн оҙатыласаҡ. Башҡортостан умартасылыҡ һәм апитерапия буйынса ғилми-тикшеренеү үҙәге етәксеһе Әмир Ишемғолов әйтеүенсә, июндә тағы бер партия бал ҡорттарын оҙатырға планлаштырыла. Хәҙер, Монголиялағы һәр икенсе бал ҡорто - сығышы менән Башҡортостандан, тип тулы ышаныс менән раҫларға мөмкин буласаҡ.

Әйткәндәй, Монголия июнь айында Башҡортостан умартасылыҡ һәм апитерапия буйынса ғилми-тикшеренеү үҙәге продукцияһын күрәсәк донъяның берҙән-бер иле түгел. 18-22 июндә ул Истанбулда Башҡортостан мәҙәниәте көндәрендә күргәҙмә-дегустацияла ла ҡатнашасаҡ. Шуныһы иғтибарға лайыҡ, үҙ баҙарын сит продукция үтеп инеүҙән тырышып һаҡлаған Төркиә властары башҡорт балын хуплап ҡабул итә. Төркиәнән һуң сиратта - Япония.