Германияға һәм Италияға эш сәфәре тамамланды

Башҡортостан Президенты Мортаза Рәхимов етәкселегендәге республиканың рәсми делегацияһы эш сәфәре менән Германияла һәм Италияла булды. Сәфәрҙең маҡсаты - Европа эшлекле даирәләре вәкилдәре менән ауыл хужалығы техникаһы етештереү өлкәһендә ике яҡлы хеҙмәттәшлек мәсьәләләрен тикшереү. 6 апрелдә Германияның Марктобердорф ҡалаһында Мортаза Рәхимов "АGСО" халыҡ-ара концернының вице-президенты Хубертус Мюльхойзер әфәнде менән хеҙмәттәшлек мәсьәләләрен тикшерҙе. "АGСО" ауыл хужалығы техникаһы эшләүҙә, етештереүҙә һәм таратыуҙа донъя лидерҙарының береһе булып тора. Башҡортостан менән "AGCO" хеҙмәттәшлегенең яҡынса варианты быға тиклем быйыл март айында концерн вәкилдәренең республикаға сәфәре барышында ҡаралғайны . Корпорация етәкселеге әйтеүенсә, Башҡортостан индустриаль үҫешкән һәм инвестиция яғынан ылыҡтырғыс төбәк булараҡ, компанияға ҡараған билдәле донъя брендтары техникаһын йыйыуҙы ойоштороу өсөн майҙан сифатында AGCO яғынан күптән ҡыҙыҡһыныу тыуҙыра. Мортаза Рәхимов менән Хубертус Мюльхойзерҙың һөйләшеп килешеүҙәре йомғаҡтары буйынса Башҡортостан Хөкүмәте менән "AGCO" концерны араһында хеҙмәттәшлек хаҡында килешеүгә ҡул ҡуйылды. Документ республикала билдәле маркалы ауыл хужалығы техникаһын йыйыуҙы ойоштороу мөмкинлеген күҙаллай. Атап әйткәндә, "НефАЗ" асыҡ акционерҙар йәмғиәте майҙандарында комбайндар йыйыу, шулай уҡ тракторҙар йыйыу буйынса берлектәге предприятие булдырыу хаҡында һөйләшеп килешелде. Башҡортостанда "Challenger", "Fendt", "Massey Ferguson", "Valtra" кеүек билдәле маркалы ауыл хужалығы техникаһын йыйыу күҙ уңында тотола. Германиға сәфәр сиктәрендә Мортаза Рәхимов һәм Башҡортостандың рәсми делегацияһы ағзалары "Fendt" маркалы тракторҙар етештереү заводында булды. Предприятиела делегация өсөн фирма менән таныштырыу үткәрелде һәм "Fendt" тракторында йөрөп ҡарау ойошторолдо. "Fendt" компанияһы "AGCO" корпорацияһы составына инә һәм Европала ауыл хужалығы техникаһы етештереүсе булараҡ билдәле. "Fendt" продукцияһы иген йыйыу комбайндарын, йыйғыс престарҙы һәм юғары техник үҙенсәлектәргә эйә булған ҡеүәтле тракторҙарҙы үҙ эсенә ала. - Трактор конструкцияһында беҙ юғары һөҙөмтәле игенселеккә өлгәшеүгә йүнәлтелгән иң алдынғы технологияларҙы тормошҡа ашырҙыҡ. Халыҡ-ара агротехник күргәҙмәләрҙәге наградалар һәм еңеүҙәр быға дәлил булып тора, - тине Башҡортостан Президенты менән осрашыуҙа "Fendt" компанияһы вице-президенты Петер Паффен. Мортаза Рәхимов "Fendt" ҡаҙаныштарын ыңғай баһаланы, уның юғары етештереүсәнлеген, экономиялылығын һәм уңайлылығын билдәләне. - "Fendt" ауыл хужалығы машиналары эшләү өлкәһендә танылған донъя лидеры булып тора. Компания продукцияһы юғары сифаты һәм яҡшы техник үҙенсәлектәре менән айырылып тора, - тине Мортаза Рәхимов. Башҡортостан Президенты "Valtra" маркалы ауыл хужалығы техникаһына юғары баһа бирҙе. "Valtra" ҡырыҫ климат шарттарына иҫәпләнгән, был Башҡортостандың ауыл хужалығы продукцияһы етештереүселәре өсөн мөһим", - тип һыҙыҡ өҫтөнә алды республика Президенты. 7 апрелдә Италияның Бреганца ҡалаһында Башҡортостан Президенты "Лаверда" комбайндар етештереү заводында булды, предприятиеның һуңғы проекттары һәм продукцияһы менән танышты. Шунда уҡ Мортаза Рәхимов "AGCO" компанияһы вәкилдәре менән бер нисә осрашыу һәм һөйләшеү үткәрҙе. Республика делегацияһының Германияға һәм Италияға сәфәре йомғаҡтарын Мортаза Рәхимов ыңғай баһаланы. Башҡортостан Президенты ауыл хужалығы техникаһы етештереүҙә лидер булып торған халыҡ-ара предприятиеларҙың аграр машиналар эшләү өлкәһендә Башҡортостан менән тығыҙ хеҙмәттәшлек итергә ниәтләүен белдерҙе. Мортаза Рәхимов фекеренсә, был агросәнәғәт комплексын артабан уңышлы үҫтереү өсөн мөһим, сөнки эш һөҙөмтәлелеге күбеһенсә сит илдәрҙә етештерелгән заманса техниканы ҡулланыуға бәйле. Башҡортостан Республикаһының рәсми делегацияһы составына Башҡортостан Республикаһы Хөкүмәте Премьер-министры урынбаҫары, сәнәғәт һәм тышҡы иҡтисади бәйләнештәр министры Юрий Пустовгаров, Башҡортостан Республикаһының Австрия Республикаһындағы вәкиле Вадим Плетнев, "НефАЗ" асыҡ акционерҙар йәмғиәте генераль директоры Рәиф Маликов инде.