Риза Фәхретдиндың 150 йыллығына арналған конференция

Өфөлә, Милли йәштәр театрында, "Волга буйында исламдың мәғрифәтселек проблемалары: I Фәхретдин уҡыуҙары" Бөтә Рәсәй ғилми-ғәмәли конференцияһы асылды. Форумда Башҡортостан мөфтийе Нурмөхәмәт Ниғмәтуллин, Рәсәй Федерацияһы Президенты Хакимиәте советнигы, Ислам мәҙәниәтен, фән һәм мәғарифты яҡлау фонды идараһы ағзаһы Алексей Гришин, Рәсәй Федерацияһы Президентының Волга буйы федераль округындағы тулы хоҡуҡлы вәкиле аппараты советнигы Игорь Симонов, Рәсәйҙең төрлө төбәктәренән ғалимдар, йәмәғәт, дини һәм сәйәси эшмәкәрҙәр ҡатнаша. Конференция Риза Фәхретдиндың тыуыуына 150 йыл тулыуға арналған. Башҡортостан Президенты Мортаза Рәхимовтың конференцияла ҡатнашыусыларға тәбрикләү һүҙен БР Президенты ҡарамағындағы Дәүләт советнигы Сергей Лаврентьев уҡып ишеттерҙе. Тәбрикләү һүҙендә, Ризаитдин Фәхретдиндың шәхесе "рухи йыһат" өлгөһө булып тора, ул донъяны танып белеүҙең иң яҡшы ысулы диндең фән менән берҙәмлегенә ҡайтып ҡала тип өндәгән, тиелә. Риза Фәхретдин үҙ ижадын дингә хеҙмәт итеү менән бергә алып барған, мосолмандарҙың хоҡуҡтарын яҡлаған, дин әһелдәрен репрессияларҙан ҡотҡарып алып ҡалған. Көндөң тәүге яртыһында пленар ултырыш үтә, төштән һуң конференция үҙ эшен секциялар буйынса дауам итәсәк. Форумда ҡатнашыусылар Ризаитдин Фәхретдиндең мираҫын тикшереү менән бәйле мәсьәләләрҙе, мосолман донъяһын реформалаштырыу проблемаларын, Рәсәйҙә дәүләт-конфессиональ мөнәсәбәттәрҙе, мосолман мәғрифәтселеген һәм мәғарифын үҫтереү мәсьәләләрен тикшерергә планлаштыра.