Мортаза Рәхимов Германияла һәм Италияла була

6-8 апрелдә Башҡортостан Президенты Мортаза Рәхимов етәкселегендәге республика рәсми делегацияһы Германияла һәм Италияла эш сәфәрендә йөрөй. Сәфәрҙең маҡсаты - Европа эшлекле даирәләре вәкилдәре менән ауыл хужалығы техникаһы етештереү өлкәһендә ике яҡлы хеҙмәттәшлек мәсьәләләрен тикшереү. 6 апрелдә Германияның Марктобердорф ҡалаһында Мортаза Рәхимов ауыл хужалығы техникаһы эшләүҙә, етештереүҙә, таратыуҙа донъя лидерҙарының береһе булған"АGСО" халыҡ-ара компанияһы етәкселеге менән осрашты. "АGСО" компанияһы вице-президенты Хубертус Мюльхойзер әфәнде менән һөйләшеүҙәрҙә хеҙмәттәшлек һәм Башҡортостанда агросәнәғәт комплексы өсөн техника һәм ҡорамалдарҙы йыйылмалы етештереүҙе ойоштороу мөмкинлеге мәсьәләләре ҡаралды. Ошо уҡ көндө Мортаза Рәхимов "Fendt" маркалы тракторҙар етештереү заводында булды. Компания "АGСО" корпорацияһы составына инә һәм Европала тракторҙар, башҡа ауыл хужалығы техникаһын етештереүсе булараҡ киң билдәле. Тракторҙар эшләү өлкәһендә компания юғары технологияларҙы уңышлы ҡуллана. Заводты ҡарау барышында Башҡортостандың рәсми делегацияһы ағзалары техниканың һуңғы өлгөләре менән танышты. Шулай уҡ һуңғы быуын "Fendt" тракторында йөрөү ҙә ойошторолдо. - Трактор конструкцияһында беҙ юғары һөҙөмтәле игенселеккә өлгәшеүгә йүнәлтелгән алдынғы технологияларҙы тормошҡа ашырҙыҡ. Халыҡ-ара агротехник күргәҙмәләрҙәге наградалар һәм еңеүҙәр быға дәлил булып тора, - тине Башҡортостан Президенты менән осрашыуҙа "Fendt" компанияһы вице-президенты Петер Паффен. Мортаза Рәхимов техниканы ыңғай баһаланы, уның юғары етештереүсәнлеген, экономиялылығын һәм уңайлылығын билдәләне. - Ауыл хужалығын артабан үҫтереү, уның рентабеллеген арттырыу өсөн иң ҡатмарлы эштәрҙе башҡарырға һәләтле заманса тракторҙар һәм комбайндар кәрәк. Үҙебеҙҙең агросәнәғәттең матди-техник базаһын нығытыу эшендә беҙ "Fendt" техникаһы кеүек күп функциялы һәм ышаныслы техникаға ҙур иғтибар бирәбеҙ, - тине һөйләшеүҙәрҙә Башҡортостан Президенты. Мортаза Рәхимов республика машина-технология станцияларын үҫтереүҙе Башҡортостан агросәнәғәт секторына дәүләт ярҙамының һөҙөмтәле формаларының береһе тип иҫәпләй. Республика бюджеты иҫәбенә ойошторолған МТС машиналар паркы күләмле эштәр башҡара. 2008 йылда 1,3 миллиард һумлыҡ 1220 берәмек сит ил ауыл хужалығы техникаһы һатып алынған. Республика башлығы фекеренсә, сит илдәрҙә етештерелгән ауыл хужалығы техникаһы агротехник эштәрҙе байтаҡҡа һөҙөмтәлерәк башҡарыу мөмкинлеге бирә һәм ураҡ барышында уңышты юғалтыуҙарҙы күпкә кәметә. Башҡортостан делегацияһы составына Башҡортостан Республикаһы Хөкүмәте Премьер-министры урынбаҫары, сәнәғәт һәм тышҡы иҡтисади бәйләнештәр министры Юрий Пустовгаров, Башҡортостан Республикаһының Австрия Республикаһындағы вәкиле Вадим Плетнев, "НефАЗ" асыҡ акционерҙар йәмғиәте генераль директоры Рәиф Маликов инде. *** Белешмә "AGСO" корпорацияһы (АҠШ) донъяның 140-тан ашыу илендә ауыл хужалығы техникаһы эшләү, етештереү, таратыу һәм уның маркетингы өлкәһендә донъя лидерҙарының береһе булып тора. Корпорацияның штаб-фатиры Дулут ҡалаһында (АҠШ, Джорджия штаты) урынлашҡан. Етештереү ҡеүәттәре Төньяҡ һәм Көньяҡ Америкала, Европала бар. Компания ауыл хужалығы өсөн техниканың тулы спектрын тәҡдим итә, шул иҫәптән тракторҙар, комбайндар, бесән әҙерләү өсөн техника, һиптерткестәр, мал аҙығы йыйыу, тупраҡ эшкәртеү һәм башҡа ҡорамалдар тәҡдим итә. AGCO корпорацияһы продукцияһы "Challenger", "Fendt", "Massey Ferguson", "Valtra" кеүек билдәле сауҙа маркалары аҫтында һатыла.