Коррупцияға ҡаршы көрәш тураһында яңы закон сығарыла

Бөгөн БР Дәүләт Йыйылышы-Ҡоролтайҙың Дәүләт ҡоролошо буйынса комитеты ултырышында "Башҡортостан Республикаһында коррупцияға ҡаршы эш итеү тураһында" Башҡортостан Республикаһы Законы проекты беренсе уҡыуҙа ҡаралды. - Эшсе төркөм тарафынан әҙерләнгән яңы закон проекты Рәсәй законына нигеҙләнә, - тине комитет рәйесе Зөфәр Сафин. - Бер яҡтан, был сәйәси документ. Икенсе яҡтан, ул һәр дәүләт власы органының вәкәләттәрен һәм яуаплылыҡ кимәлен билдәләй. Шуға күрә закон проектында профилактика яғына төп иғтибар бирелергә тейеш. Республика закон проектында ҡулланылған төп төшөнсәләр - "Коррупцияға ҡаршы тороу тураһында" Федераль закондан. Проектта ҡаршы тороуҙың төп принциптары һәм бының өсөн ҡулланылған саралар бирелгән. Комитет ағзалары закон проектын хупланы һәм уны сираттағы ултырыш көн тәртибенә индерергә һәм беренсе уҡыуҙа ҡабул итеү өсөн Дәүләт Йыйылышы Президиумы ултырышына сығарырға ҡарар итте.