В.В. Путин Думаға көрсөккә ҡаршы планын тәҡдим итәсәк

РФ Премьер-министры, "Берҙәм Рәсәй" партияһы лидеры Владимир Путин бөгөн Дәүләт Думаһында Хөкүмәттең 2008 йылдағы эше тураһында отчет менән сығыш яһаясаҡ һәм депутаттарға ағымдағы йылға көрсөккә ҡаршы план тәҡдим итәсәк. Хөкүмәт башлығы халыҡ тарафынан һайланыусыларҙың 12 һорауына (һәр фракциянан өсәр) яуап бирәсәк. Атап әйткәндә, "Берҙәм Рәсәй"ҙән депутаттар Премьер-министрҙан фәнни технологияларҙы яҡлау һәм инновацион секторҙы үҫтереү буйынса Хөкүмәт нимәләр планлаштырыуы хаҡында һорашырға йыйына. Владимир Путиндың докладынан һуң фракциялар вәкилдәре сығыш яһаясаҡ, тип хәбәр итә ЕR. Ултырыштың икенсе өлөшөндә депутаттар 2009 йылғы федераль бюджетҡа Хөкүмәт төҙәтмәләрен ҡараясаҡ. Уҙған аҙнала Дәүләт Думаһына ингән закон проекты түбәнге палата Комитеты тарафынан хупланды. Элек раҫланған күрһәткестәр менән сағыштырғанда 2009 йыл бюджеты табыштары 4 триллион 213,5 миллиард һумға кәмейәсәк һәм 6 триллион 713,6 миллиард һум тәшкил итәсәк. Сығымдар 9 триллион 692 миллиард һумға тиклем артасаҡ. Шулай итеп, дефицит 2 триллион 978,4 миллиард һум тәшкил итәсәк. Депутаттарға закон проектын финанс министры Алексей Кудрин тәҡдим итәсәк, тип көтөлә.