Премьер-министр Урал аръяғы буйлап эш сәфәрендә

БР Хөкүмәте Премьер-министры Раил Сарбаев Урал аръяғы буйлап эш сәфәренә сыҡты. Хәтерегеҙгә төшөрөп үтәбеҙ, быйыл август айында ҙур педсовет Баймаҡ, Йылайыр һәм Хәйбулла райондары биләмәһендә үтәсәк, шуға күрә Раил Сарбаев был мөһим сараға әҙерлек барышын үҙ контроленә алырға йыйына. Атап әйткәндә, Баймаҡта "Баһадир" физкультура-сәләмәтләндереү комплексы эргәһендә спорт-йөҙөү бассейны төҙөлә. Хәҙерге ваҡытта бында биҙәү эштәре алып барыла, һәм төҙөүселәр Премьерҙы, объект билдәләнгән ваҡытҡа файҙаланыуға тапшырыласаҡ, тип ышандырҙы. Раил Сарбаев төҙөлөштө финанслау мәсьәләләре һәм ҡорамалдарҙы килтереү сроктары менән ҡыҙыҡһынды. Әйткәндәй, был спорт ҡоролмаһын йыһазландырыуға 15 миллион һум тирәһе аҡса талап ителәсәк. Премьер-министр БР "Урал аръяғы" машина-технология станцияһы дәүләт унитар ауыл хужалығы предприятиеһының Баймаҡ филиалында ла булды, бында ул яҙғы баҫыу эштәренә әҙерлек дәрәжәһе менән ҡыҙыҡһынды. Быйыл бында яңы техника - 21 "Джон Дир" тракторы һәм сәскестәре менән 21 "Флексикойл" сәсеү комплексы килтерелде. Был комплекстар МТС-тың өс филиалы буйлап - Әбйәлил, Баймаҡ һәм Хәйбулла райондарына бүлеп биреләсәк. Билдәле булыуынса, был МТС былтыр Урал аръяғының биш районын хеҙмәтләндереү өсөн төҙөлгәйне. Техника республика бюджеты средстволары иҫәбенә һатып алынды. Раил Сарбаев предприятие етәкселеге иғтибарын ерҙе МТС милкенә, шулай уҡ ҡуртымға рәсмиләштереү процедураһын тиҙләтеү кәрәклегенә йүнәлтте.