Баш ҡаланың иң яҡшы хеҙмәткәрҙәрен хөрмәтләнеләр

Өфө ҡалаһы ҡала округы Советы рәйесе Ирек Ниғмәтуллин үҙ эш урынында тыуған ҡалаһы сәскә атыуы өсөн бик күп эш башҡарған 34 өфөлөгә хеҙмәте өсөн наградалар тапшырҙы. Улар араһында - фән һәм сәнғәт, һаулыҡ һаҡлау һәм спорт вәкилдәре, милиция хеҙмәткәрҙәре, хәрбиҙәр, урам йыйыштырыусылар, эшҡыуарҙар. Бүләкләү тантанаһы бик йылы, ихлас атмосферала үтте, быға ҡала Советы рәйесенең һәр бүләкләнеүсенең эшмәкәрлегендә мөһим һыҙаттарҙы табып билдәләп үтә белеү оҫталығы булышлыҡ итте. Наградланыусы өфөләрҙең ҡаҙаныштары тураһында һөйләп, Ирек Ниғмәтуллин республика баш ҡалаһының проблемалары һәм уңыштары тураһында ла һөйләне, финанс көрсөгөнә ҡағылды һәм республика Президентының Башҡортостан Дәүләт Йыйылышы-Ҡоролтайға Мөрәжәғәтнамәһенән, беҙҙә 90-сы йылдар башындағы "шок реформалары" һәм 1998 йылғы дефолтты еңеп сығыу осоронда иҡтисадҡа идара итеүҙең уникаль тәжрибәһе тупланды, тигән һүҙҙәрен иҫкә төшөрҙө. "Яңы ҡаршылыҡты ла еңеп сығасаҡбыҙ, - тип ышандырҙы ул һүҙен йомғаҡлап. - Элекке ваҡытта ла, бөгөн дә яуаплылыҡ тойоп, ныҡышмал, эшен белеп һәм киләсәкте күҙаллап эшләгән кешеләр уңышҡа өлгәшә. Был һүҙҙәр тулыһынса һеҙгә ҡағыла, хөрмәтле хеҙмәтсәндәр".