Спартак Ильясов: "Һәр кемгә асыҡ булырға тырышам"

Стәрлетамаҡта Дәүләт Думаһы депутаты, Дәүләт Думаһының Регламент һәм эште ойоштороу буйынса комитеты рәйесе урынбаҫары Спартак Әхмәтов республика һәм ҡала киң мәғлүмәт саралары журналистары менән осрашты. Спартак Ғәли улы Дәүләт Думаһында үҙенең эше, парламенттың түбәнге палатаһына ҡарауға бирелгән закон проекттары пакеттары, парламенттың РФ хөкүмәте һәм төбәк власының бөтә тармаҡтары менән үҙ-ара эш итеүе, шулай уҡ көрсөккә ҡаршы программа тураһында һөйләне, журналистарҙың һорауҙарына яуап бирҙе. Ә осрашыуҙан алда Спартак Ғәли улы Стәрлетамаҡ һайлаусыларын сираттағы ҡабул итеү үткәрҙе. - Мин һәр ваҡыт кешеләргә асыҡ булырға тырышам. Килгән һайын предприятиелар етәкселәре, эшҡыуарҙар, киң мәғлүмәт саралары вәкилдәре, ябай халыҡ менән аралашам. Бик күп хаттар, телеграммалар алам, телефон шылтыратыуҙары ҡабул итәм, - тип билдәләне депутат. - Ҡала округы хакимиәтендә даими нигеҙҙә минең ярҙамсым эшләй. Ҡала халҡы үҙҙәре теләгән ваҡытта уға, ҡала филармонияһы бинаһында урынлашҡан "Берҙәм Рәсәй" сәйәси партияһының йәмәғәт ҡабул итеү бүлмәһенә мөрәжәғәт итә ала. Депутатлыҡ вәкәләттәрен үтәй башлаған тәүге көндәрҙән алып мин үҙемә, һәр мөрәжәғәт иткән кеше менән эшләргә, тигән маҡсат ҡуйҙым. Бәлки, барыһына ла ярҙам итеп булмаҫ, әммә һәр кемде ҡабул итергә, тыңларға, һәр береһенә консультация йәки эшлекле кәңәш бирергә тырышам.