Комиссиялар ултырышы үтте

1 апрелдә Республика йортонда Башҡортостан Президенты Мортаза Рәхимов рәйеслегендә Башҡортостан Республикаһының терроризмға ҡаршы, коррупцияға ҡаршы һәм наркотиктарға ҡаршы комиссиялары ултырыштары булды. Терроризмға ҡаршы комиссия ултырышында 2009-2012 йылдарға терроризмды һәм экстремизмды иҫкәртеү, Башҡортостан Республикаһы халҡының һәм территорияһының именлеген тәьмин итеү комплекслы планы ҡабул ителде. Ҡайһы бер ҡала һәм райондарҙың терроризмға ҡаршы комиссиялары етәкселәренең былтырғы эш йомғаҡтары тураһында отчеттары тыңланды. Коррупцияға ҡаршы комиссия ултырышында хоҡуҡ һаҡлау органдары етәкселәренең Рәсәй Президенты Д.А. Медведев раҫлаған Коррупцияға ҡаршы эш итеүҙең милли планын үтәү буйынса эшмәкәрлек йомғаҡтары тураһындағы мәғлүмәттәре тыңланды. Комиссия тарафынан ошо мәсьәлә буйынса ҡабул ителгән ҡарар хоҡуҡ һаҡлау органдарының, министрлыҡтар һәм ведомстволарҙың ошо өлкәләге эшмәкәрлеген көйләүҙе артабан яҡшыртыуға йүнәлтелә. Республика мәғариф министры Зиннәт Аллаяров һәм Башҡортостан Республикаһының юғары уҡыу йорттары ректорҙары советы рәйесе, БР Фәндәр академияһы президенты, Өфө дәүләт нефть техник университеты ректоры Айрат Шаммазов "Башҡортостан Республикаһы биләмәһендә урынлашҡан юғары уҡыу йорттары филиалдары һәм вәкиллектәренең, шулай уҡ дәүләттеке булмаған юғары уҡыу йорттарының мәғариф өлкәһендәге ҡануниәтте үтәү буйынса эшмәкәрлеге тураһында"ғы мәсьәлә буйынса сығыш яһаны. Наркотиктарға ҡаршы комиссия ултырышында Рәсәй Наркотиктарҙың әйләнешенә контроль буйынса федераль хеҙмәтенең Башҡортостан Республикаһы идаралығы начальнигы Валерий Кокин 2007-2009 йылдарға Башҡортостан Республикаһында наркотиктарҙы яуыз ниәттә файҙаланыуға һәм уларҙың законһыҙ әйләнешенә ҡаршы эш итеү буйынса программаны үтәү барышы, шулай уҡ 2008 йылда республика район һәм ҡала хакимиәттәре араһында наркотиктарға ҡаршы эште иң яҡшы ойоштороуға республика конкурсы йомғаҡтары хаҡында һөйләне.