Бөрйән районында тайыштабан Ағиҙел йылғаһы аша йөҙөп сыҡҡан

Бөрйән районында айыу Ағиҙел йылғаһы аша йөҙөп сыҡҡан. Белоретта йәшәүсе Зөлфиә Муллағолова «Башинформ» агентлығына хәбәр итеүенсә, видеояҙманы уның ауылдашы һалағыш мәлендә төшөргән.

«Видео Иҫке Монасип ауылы янында төшөрөлгән. Ул интернетҡа таралды инде. Айыу ял итеүселәр алдынан ғына йылға аша йөҙөп сыҡҡан», — тип уртаҡлашты Зөлфиә.

Социаль селтәрҙә билдәле ғалимә Ғәҙилә Мөҙәрисова был айыу хаҡында бына нимә яҙа.

«Быйыл урманда айыу күп тип, ауылда кеше йүнле-башлы еләккә лә йөрөмәй икән дә баһа? Ул айыуҙар еләк йыйырға ғына түгел, һыу инергә, Иҙел буйлап ағырға ла мишайт итә баштаған әле ул», — ти ғалимә.