Башҡортостанда ҡатын-ҡыҙҙарҙы Курск ҡалаһына донорлыҡҡа ебәреү хаҡындағы хәбәрҙе кире ҡаҡтылар

Социаль селтәрҙәрҙә, йәнәһе, Башҡортостандан билдәле бер ҡан төркөмө булған ҡатын-ҡыҙҙарҙы мәжбүри рәүештә Курск өлкәһенә донорлыҡҡа ебәрәсәктәр, тигән фейк таралды. Хәбәр республика Башлығы указына нигеҙләнеп таратыла.

Ысынында иһә бер кем дә граждандарҙы ҡан тапшырырға мәжбүр итергә йыйынмай. Башҡортостан Башлығы бындай указдар сығарманы. Фейк авторҙары документты график мөхәррирҙә эшләгән, тип хәбәр итәләр «Фейктарға ҡаршы көрәш. Башҡортостан» телеграм-каналында.

Ялғанды ​​бер нисә күрһәткес ярҙамында асыҡларға мөмкин:

• указдың номеры ла, датаһы ла юҡ, улар бындай документтарҙа һәр саҡ була;
• «указ» рәсми хоҡуҡи мәғлүмәт интернет-порталында баҫылмаған;
• норматив-хоҡуҡи акттың атамаһы ҡабатланған;
• документта төбәк етәксеһенең исем-шәрифен яҙыу өсөн айырым урын бүленһә лә, ни өсөндөр ул унда яҙылмаған, вазифаһы ҡабатлап күрһәтелгән;
• форматлау ҙа аҡһай - документ ситтәре күскән, пункт номерҙарынан һуң буш урындар ҡалдырылмаған, ә указдарҙың төп нөсхәһендә бөтөнләй икенсе шрифт ҡулланыла.

Быға тиклем «Башинформ» агентлығы Рәсәйҙең Юғары мөфтөйө үҙенең исеменән таратылған ялған хәбәрҙе инҡар итеүе хаҡында яҙғайны.

Автор: Ләйсән Закирова

https://www.bashinform.ru/news/social/2024-08-13/v-bashkirii-oprovergli-feyk-o-prinuditelnoy-otpravke-zhenschin-na-donorstvo-v-kursk-3883550