Бөрйәндә күпер емерелгән юлда туристарға ярҙам талап ителгән

Бөрйән районында ҡойма ямғыр яуыуы сәбәпле ике урында, Һарғая ауылынан Иҫке Собханғол — Ҡағы ауылы трассаһына тиклем юл йыуылған. Башҡортостан Ғәҙәттән тыш хәлдәр буйынса дәүләт комитетының матбуғат хеҙмәтенән хәбәр итеүҙәренсә, өйҙәренә ҡайта алмаған биш турисҡа ҡотҡарыусылар ярҙамы талап ителгән.

Ҡотҡарыусылар бәләгә тарыған кешеләрҙе емерелгән күперҙең икенсе яғына алып сығыу өсөн урынға юлланған.

Улар туристарҙы хәүефһеҙ урынға алып барырға йыйына, шулай уҡ кәрәк осраҡта урындағы халыҡҡа ярҙам күрһәтергә әҙер.

Бөгөн Әбйәлил районында ла ҡойма ямғыр 76 йорт ихатаһын һыу баҫыуға сәбәпсе булғайны.

https://www.bashinform.ru/news/law/2024-07-26/v-burzyanskom-rayone-bashkirii-iz-za-livnevyh-dozhdey-v-dvuh-mestah-razmylo-dorogu-3862805