Ҡырмыҫҡалы районы хакимиәтендә хәрби комиссарҙың һәләк булыуын раҫланылар

Ҡырмыҫҡалы районы хакимиәтендә Ҡырмыҫҡалы һәм Архангел райондарының хәрби комиссары Ринат Ғималовтың фажиғәле һәләк булыуын рәсми рәүештә раҫланылар.

«Профессиональ етәксе, яҡшы ғаилә башлығы арабыҙҙан китте. Быйыл май айында уның беҙҙең район биләмәһендә эшләүенә 20 йыл тулыр ине. Ошо осорҙа ул граждандарҙы хәрби хеҙмәткә саҡырыу йәһәтенән әүҙем эш алып барҙы. Хәрби комиссариат коллективы сәғәт кеүек эшләне, етәксе тап шундай тәртип булдырғайны», - тиелә коллегаларының хәбәрендә.

Хәтерегеҙгә төшөрәбеҙ, Ринат Нуретдин улы яңыраҡ Шайморатов һәм Салауат Юлаев ордендары менән бүләкләнде. 2003 йылда ул Көньяҡ Осетияла мөһим дәүләт объектын баҫып алыуға юл ҡуймаған, элемтә узелдарын һаҡлаған, ә шул уҡ йылдың авгусында Цхинвал сауҙа үҙәгендә ҡулдан эшләнгән шартлатҡысты зарарһыҙландырған.

«Башинформ» хәбәр иткәнсә, кисә Өфө — Инйәр — Белорет трассаһының 15-се километрында булған юл һәләкәтендә хәрби комиссарҙың ғүмере өҙөлгән. Яҡынса мәғлүмәттәр буйынса, Renault Clio автомобиле ҡаршы һыҙатҡа сығып, Toyota Isis менән бәрелешкән. Аварияла тағы бер кеше йән биргән. Икәүһе дауаханаға оҙатылған.

Ринат Ғималовты 28 мартта ерләйҙәр. Хушлашыу ваҡытын һәм урынын өҫтәмә рәүештә хәбәр итәсәктәр.

«Башинформ» мәрхүмдең ғаиләһенең һәм яҡындарының ауыр ҡайғыһын уртаҡлаша.

https://www.bashinform.ru/news/law/2024-03-27/v-administratsii-karmaskalinskogo-rayona-bashkirii-podtverdili-gibel-voenkoma-3702859