Башҡортостанда ветеринарҙар автомобилдән тапалған айыу балаһын ҡотҡарған

Башҡортостанда Йылайыр районы ветеринарҙары айыу балаһын ҡотҡарған. Хайуанды бөгөн иртән егерь табып алған. Ул райондың ветеринария хеҙмәтенә шылтыратҡан һәм Ҡашҡар һәм Юлдыбай ауылдары араһындағы «Аҡау» тигән урында автомобилдән тапалған айыу балаһы ятыуы хаҡында хәбәр иткән.

Йылайыр районының ветхеҙмәте күрһәтелгән урынға юлланған. Бында ысынлап та юл буйында айыу ятыуы асыҡланған. Белгестәр урында тайыштабанды ҡарағандан һуң район үҙәгенә алып барған. Тикшереү үткәргәндән һуң айыу балаһының бер ере лә һынмауы асыҡланған.

Йылайы районы баш ветеринар табибы Илшат Ҡарасов «Башинформ» агентлығына хәбәр итеүенсә, айыу балаһы имгәнеүе һәм башы һелкенеүе асыҡланған. Кәрәкле процедураларҙан һуң ул тын ала башлаған һәм көслө итеп үкерергә тотонған. Хайуан үҙе янына кешеләрҙе яҡын ебәрмәгән.

Айыу балаһына ауыртыуҙы баҫа торған кәрәкле инъекция ҡуйғандар. Ул әлегә райондың ветеринария хеҙмәтендә ҡалдырылған, һуңыраҡ артабанғы яҙмышы хәл ителәсәк.

«Республика Башлығы Радий Фәрит улы Хәбиров әйтмешләй, беҙ Башҡортостанда бер кемде лә ташламайбыҙ. Ветеринария хеҙмәтенә рәхмәтемде белдерәм. Быға тиклем беҙ Йылайыр районында Тишка исемле айыуҙы һәм аҡҡошто ҡотҡарғайныҡ», — тип яҙа социаль селтәрҙә район башлығы Борис Мелкоедов.