Учалы районында янғындан һуң өс ғаилә торлаҡһыҙ ҡалған. 13 июлдә көндөҙ Октябрьский ауылында хужалыҡ ҡаралтылары янып киткән. Янғын тураһында һуң хәбәр иткәндәр, етмәһә, көслө ел уттың күрше йорттарға таралыуына булышлыҡ иткән, тип белдерҙеләр «Башинформ»ға Башҡортостан Ғәҙәттән тыш хәлдәр министрлығының матбуғат хеҙмәтендә.
Ике йорт (уларҙың береһе ике хужаныҡы), 4 мунса, 4 һарай, 2 гараж, келәт, утынлыҡ, күгәрсен кетәге һәм аласыҡ янып бөткән. Бер сәғәттән янғын һүндерелгән. Ҡорбандар юҡ. Урында Рәсәй Ғәҙәттән тыш хәлдәр министрлығының тәүтикшереүсеһе эшләй, янғын сәбәбе асыҡлана.