Пермдә биш йәшлек ҡыҙы менән хәбәрһеҙ юғалған ҡатынды үле килеш тапҡандар

Пермь крайында бер аҙна буйына эҙләгән әсә менән ҡыҙҙы үле килеш тапҡандар. Был турала кисә «Бәйләнештә» социаль селтәрендәге  сәхифәһендә Ирина Буханова исемендәге эҙәрмәндәр отряды хәбәр итте.

«КП-Пермь» баҫмаһы мәрхүмдәрҙең туғандарына һылтанып яҙыуынса, уларҙың йәнһеҙ кәүҙәһен бер ҡасабала тапҡандар.

«Тәфтишселәр шылтыратып, уларҙың ниндәйҙер ҡасабала үлгән килеш табылғанын әйтте. Үлтергәндәр, тинеләр, ауыр енәйәт, енәйәтсене тотҡандар, башҡа бер нәмә лә белмәйем», — тип туғанының һүҙҙәрен килтерә баҫма.

«Башинформ» хәбәр иткәнсә, Ишембайҙа йәшәгән 45 йәшлек ҡатын 5 йәшлек ҡыҙы менән Пермдә ҡунаҡта булған. 17 августан 18-енә ҡарай төндә улар Дзержинский районы Ветлуга урамындағы йорттан сығып киткән һәм хәбәрһеҙ юғалған.

Хоҡуҡ һаҡлаусылар әсәнең һәм баланың үлем сәбәптәрен асыҡлай. Пермь крайы буйынса Тәфтиш комитетынан рәсми комментарийҙар әлегә юҡ.

https://www.bashinform.ru/news/law/2022-08-25/propavshih-bez-vesti-v-permi-zhitelnitsu-bashkirii-s-pyatiletney-dochkoy-nashli-mertvymi-2921828