Башҡортостанда пациент дауаханала вафат булғандан һуң енәйәт эше ҡуҙғатылды

ӨФӨ, 2018 йыл, 10 апрель. /«Башинформ» мәғлүмәт агентлығы, Әлфиә Әғлиуллина/. Башҡортостандың Туймазы районында йәшәгән ир аяғына операция үткәргәндән һуң дауаханала вафат булған. Фажиғәле осраҡ 5 апрелдә Туймазы үҙәк район дауаханаһында теркәлгән. 32 йәшлек пациент һынған аяғына операция яһатҡандан һуң яҡты донъя менән хушлашҡан. Үлемгә операциянан һуң аяҡты йәрәхәтләү һөҙөмтәһендә ҡанға май эләгеүе сәбәпсе булыуы ихтимал. Әлеге ваҡытта пациенттың үлем сәбәбен асыҡлайҙар.

Республика Тәфтиш комитетының тикшереү һөҙөмтәләренә ярашлы, Рәсәй Федерацияһы Енәйәт кодексының 109-сы статьяһының 2-се бүлегендә ҡаралған енәйәт билдәләре буйынса енәйәт эше ҡуҙғатылған (үҙенең һөнәри бурыстарын тейешенсә үтәмәү арҡаһында кешене үлемгә дусар итеү).

«Медицина документтары тупланған һәм эксперт учреждениеһында комиссия суд-медицина экспертизаһы тәғәйенләнгән. Шаһиттарҙан һорау алыу, ваҡиға сәбәптәрен асыҡлауға йүнәлтелгән башҡа тикшереү эштәре бара. Тәфтишсе сирлегә медицина ярҙамы күрһәтеү стандарттарын һәм тәртип талаптарын үтәү буйынса дауаханалағы медицина персоналының эш итеүенә юридик баһа бирергә тейеш. Енәйәт эшен тикшереү дауам итә», — тип хәбәр итә Рәсәйҙең Башҡортостан буйынса Тәфтиш комитеты.

http://www.bashinform.ru/news/1141606-v-bashkirii-posle-smerti-patsienta-v-bolnitse-vozbuzhdeno-ugolovnoe-delo-/