Башҡортостанда апалы-һеңлеле ҡыҙҙар тарыған фажиғә тураһында тулыраҡ мәғлүмәт билдәле булды

ӨФӨ, 2018 йыл, 26 февраль. /«Башинформ» мәғлүмәт агентлығы, Ксения Калинина/. Уҙған байрам көндәрендә Башҡортостанда фажиғә теркәлгән. Ҡаяла ике уҡыусы ҡыҙ табылған. Алдан хәбәр ителгәнсә, 16 йәшлек ҡыҙ урында һәләк булған, ә 14 йәштәгеһе Сибай дауаханаһына оҙатылған. Тикшереү эштәре бара.

«Башинформ» агентлығы ҡыҙҙарҙың ҙур булмаған ауылда йәшәгәндәрен асыҡланы. Унда башланғыс мәктәп кенә бар. Улар күрше ауылға йөрөп уҡыған, йәмәғәт эштәрендә лә әүҙем ҡатнашҡан. Мәктәпте тамамлағас, уҡырға инеү хаҡында хыялланған. Хәйбулла районы хакимиәте башлығының социаль мәсьәләләр буйынса урынбаҫары, бәлиғ булмағандар эштәре буйынса комиссия рәйесе Минзәлә Баймырҙина уҡыусыларҙы гел йылмайып ҡына торған, ярҙамсыл, аралашыусан тип ҡылыҡһырланы. Уның һүҙҙәренсә, ҡыҙҙарҙың әсәһе — урындағы мәктәптә башланғыс кластарға белем бирә, йәмәғәтсе. Атаһы вахта менән эшләй. Ошо имен ғаиләлә тағы ике бала тәрбиәләнә.

Яҡынса мәғлүмәттәр буйынса, һәр ғаиләләге кеүек байрам көндө (23 февралдә) ата-әсә мунса яға, киске аштан һуң балаларын йоҡларға һала. Күпмелер ваҡыттан һуң әсә кеше, ниҙер һиҙенеп, балаларын ҡарарға тип бүлмәгә инһә, унда бер кем дә булмай. Ҡыҙҙар тәҙрә аша сығып ҡасҡан. Ҡатын уларҙы эҙләй башлай: ауыл бәләкәй булғанлыҡтан, тиҙ генә өйҙәр буйлап йөрөп сыға һәм ҡыҙҙарын мәктәптә табып ала. Асыҡланыуынса, улар, өйҙән мәктәп асҡысын һорауһыҙ алып, дуҫтары менән бергәләп байрам итеп ултырған. Малайҙар ҡаса, әсә иһә ҡыҙҙарын әрләй башлай. Ул мәктәпте бикләгән арала ҡыҙҙар юҡ була. Ҡатын ирен һәм энеһен уята — улар балаларҙы эҙләй башлай. Ауыл эргәһендә бейек ҡая бар. Энеһе ҡыҙҙарҙы тап ошо ҡая янында таба ла инде.

Урындағы хакимиәт вәкиле мәғлүмәте буйынса, дауаханала зыян күргән ҡыҙ аңына килгән һәм ошо ҡылығыбыҙ өсөн оят, тип әйткән, сөнки уларҙың ғаиләһе — өлгөлө. 14 йәшлек уҡыусы ныҡ имгәнгән, аяҡ-ҡулдары өшөп бөткән. Ул реанимацияла ята. Әле уның менән Өфө табиптары эшләй.

«Был — ғаилә һәм район өсөн ҙур фажиғә. Беҙ ошо осраҡ буйынса бәлиғ булмағандар эштәре буйынса комиссияның сираттағы ултырышын үткәрҙек, эш планын төҙөнөк. Өфөнән психологтар саҡырылған, улар класс, ата-әсәләр, халыҡ менән эшләргә тейеш», — тине ведомство башлығы урынбаҫары.

http://www.bashinform.ru/news/1121529-v-bashkirii-stali-izvestny-podrobnosti-tragedii-proizoshedshey-s-sestrami-shkolnitsami/