Йәш ҡыҙҙың ғүмерен ҡыйыуҙа ғәйепләнеүсе Өфө дауаханаһында донъя ҡуйған

ӨФӨ, 2018 йыл, 22 ғинуар. /«Башинформ» мәғлүмәт агентлығы, Ксения Калинина/. Өфөлә 26 йәшлек Үзбәкстан гражданы 23 йәшлек ҡыҙҙың ҡулын һорай, ләкин ул уға тәҡдимен кире ҡаға. Алдан хәбәр ителгәнсә, уҙған йылдың декабрендә Черниковка биҫтәһендәге магазинда ҡот осҡос фажиғә теркәлде. Ҡыҙ ярҙам һорап бинаға килеп инә. Ир уға 17 тапҡыр бысаҡ менән сәнсә һәм үҙенә ҡул һалырға маташа, ләкин килеп сыҡмай. Ваҡиға шаһиттарының береһе төшөргән видеола ҡанға батҡан енәйәтсе иҙәндә ята һәм үҙен үлтереүҙәрен һорай.

Ҡыҙ йәрәхәттәрҙән урында уҡ һәләк була. Енәйәтсе үҙенең күкрәгенә бысаҡ ҡаҙай. Ир 13 ғинуарға тиклем ауыр хәлдә дауаханала ята. «Башинформ» агентлығына билдәле булыуынса, ҡыҙҙы үлтереүҙә ғәйепләнеүсе, аңына килмәйенсә, медицина учреждениеһында яҡты донъя менән хушлашҡан.

Рәсәй Тәфтиш комитетының Башҡортостан буйынса Тәфтиш идаралығының матбуғат хеҙмәтендә мәғлүмәтте раҫланылар.

«Ғәйепләнеүсе дауаханала вафат булды. Уның үлем сәбәбен билдәләү өсөн суд-медицина экспертизаһы тәғәйенләнде», — тип аңлатма бирҙеләр ведомствола.

Хәтерегеҙгә төшөрәбеҙ, республиканың Тәфтиш комитеты «Үлтереү»статьяһы буйынса енәйәт эше ҡуҙғатты. Был ваҡытта енәйәтсе дауаханала һаҡ аҫтында булды.

http://www.bashinform.ru/news/1106446-v-ufimskoy-bolnitse-skonchalsya-podozrevaemyy-v-zhestokom-ubiystve-devushki/