«Анталья – Өфө» рейсы пассажиры самолетта ғауға ҡуптарған

ӨФӨ, 2017 йыл, 9 октябрь. /«Башинформ» мәғлүмәт агентлығы, Ксения Калинина/. Өфөлә транспорт полицияһы хеҙмәткәрҙәре «Анталья — Өфө» авиарейсының һауа судноһы пассажирын административ яуаплылыҡҡа тарттырҙы. «Башинформ» агентлығына ведомствоның матбуғат хеҙмәтенән хәбәр итеүҙәренсә, быйыл октябрь айында осош ваҡытында 31 йәшлек иҫерек авиапассажир һүгенгән, тирә-йүндәгеләрҙе кәмһеткән, шулай уҡ үҙенең 26 йәшлек юлдашының битенә һуҡҡан. Бортпроводниктар һәм пассажирҙар янъялсыны саҡ тынысландырған.

Самолет ергә төшкәс, транспорт полицияһы хеҙмәткәрҙәре йәмәғәт тәртибен боҙған кешене дежур бүлеккә алып киткән. Тәртип боҙоусыға ҡарата «йәмәғәт урындарында эскән килеш йөрөгән өсөн» статьяһы буйынса административ хоҡуҡ боҙоу тураһында протокол төҙөлгән һәм 1000 һум штраф һалынған.