Республикала приставтар торлаҡ-коммуналь хужалыҡ өсөн бурыстарҙы түләттереү буйынса эште көсәйтәсәк

ӨФӨ, 2017 йыл, 22 июнь. /«Башинформ» мәғлүмәт агентлығы, Ольга Мортазина/. Башҡортостанда яңы йылытыу миҙгеленә әҙерлек осоронда «Уңайлыҡ өсөн түләргә кәрәк» акцияһы уҙғарыла. Суд приставтары идара итеүсе компаниялар менән берлектә милекте яҙып алыу һәм уға арест һалыу, хеҙмәттәр күрһәтеүҙе туҡтатыу өсөн бурыслыларға бара. Түләмәгәндәргә мәжбүри түләттереүҙең бөтә сараларын ҡулланыу ҡаралған, тип иҫкәрттеләр Федераль суд приставтары хеҙмәтенең Башҡортостан буйынса идаралығында.

Хеҙмәт мәғлүмәттәре буйынса, ағымдағы йылдың биш айында ресурс менән тәьмин итеүсе ойошмалар файҙаһына яҡынса 362 миллион һум ҡайтарылған. Был уҙған йылдың ошо осорона ҡарағанда өс тапҡырға күберәк.