Өфөлә законһыҙ парковка өсөн 100 мең һумға тиклем штраф янай

ӨФӨ, 2017 йыл, 6 июнь. /«Башинформ» мәғлүмәт агентлығы, Ольга Мортазина/. Өфөлә киң таралған административ боҙоуҙарҙың береһе – законһыҙ парковка, тип иҫәпләйҙәр республиканың Юстиция эштәре буйынса дәүләт комитетында. 2017 йылдың тәүге кварталында 1337 кешегә ҡарата материал төҙөлгән, 2,9 миллион һумдан ашыу суммаға штраф һалынған.

Законһыҙ парковка өсөн Башҡортостан Республикаһының Административ хоҡуҡ боҙоуҙар тураһындағы кодексының «Төҙөкләндереү ҡағиҙәләрен боҙоу» статьяһы буйынса штраф һалына. Штраф юридик берәмектәр өсөн – 50 000-100 000 һум, вазифалы кешеләр өсөн – 10 000-15 000 һум һәм граждандар өсөн 2 000-3 000 һум тәшкил итә.

«Өфө биләмәһендә спорт һәм балалар майҙансыҡтарында, газондарҙа, йәшел үҫенте участкаларында, ҡаты ҡатламы булмаған участкаларҙа транспорт сараларын файҙаланыу һәм йүнәтеү, йыуыу, ошо участкаларҙы тапау, уларҙың өҫтөнә транспорт сараларын ҡуйыу тыйылған. Күп фатирлы йорттар төҙөлгән урында, газ, электр бүлеү станциялары эргәһендә, ихата биләмәләрендәге юлға транспорт сараһын ҡуйыу законһыҙ тип иҫәпләнә», — тип аныҡлыҡ индерҙе юристар.