Башҡортостандың Контроль-иҫәп палатаһы йыл йомғаҡтары буйынса отчет бирҙе

ӨФӨ, 2017 йыл, 3 март. /«Башинформ» мәғлүмәт агентлығы/. Башҡортостан Республикаһы Контроль-иҫәп палатаһы 2016 йылдағы эшмәкәрлеге буйынса отчет бирҙе. Ведомство башлығы Рәмил Исҡужин хәбәр итеүенсә, һаулыҡ һаҡлау, мәғариф, мәҙәниәт, агросәнәғәт комплексы, транспорт, муниципаль берәмек өлкәһендә 134 контроль тикшереү һәм эксперт-аналитика сараһы уҙғарылды. Уларҙан 50 тикшереү бюджет аҡсаһын һөҙөмтәле файҙаланыуға ҡағылды.

«Һәр тикшереү һөҙөмтәләре нигеҙендә Башҡортостан Республикаһы милек мәнфәғәттәрен яҡлау буйынса ҡанун тарафынан ҡаралған саралар ҡабул ителде. Контроль-иҫәп палатаһы биргән күрһәтмәләрҙе тейешенсә үтәү мәсьәләһен, кәрәкле саралар күреү тулылығын даими контролдә тотабыҙ. Шуның менән бер рәттән ҡайһы бер боҙоуҙар һәм уларҙың эҙемтәләре, мәҫәлән: арттырылған хаҡтар буйынса һатып алыуҙар, милекте баҙар хаҡынан түбәнерәккә һатыу, аҡсаны һөҙөмтәһеҙ ҡулланыу – төҙәтеп булмаҫлыҡ тиерлек эштәр. Бындай осраҡтарҙа административ һәм дисциплинар яуаплылыҡ әмәлен күреү мөһим сараға әйләнә», — тип билдәләне Контроль-иҫәп палатаһы рәйесе.

Ведомство мәғлүмәттәре буйынса, бер йылда административ яуаплылыҡҡа 69 вазифалы кеше тарттырылды, 105-е дисциплинар яуаплылыҡ кеүек яза алды, етәүһе эшенән бушатылды. Башҡортостандың Контроль-иҫәп палатаһы материалдары буйынса прокуратура органдары ҡануниәтте боҙоуҙы бөтөрөү тураһында 16 күрһәтмә индерҙе, административ хоҡуҡ боҙоу хаҡында 11 эш асты.