Башҡортостандың баш суд приставы итеп Илнур Мәхмүтов тәғәйенләнде

ӨФӨ, 2017 йыл, 20 ғинуар./«Башинформ» мәғлүмәт агентлығы, Әлим Фәйезов/. Рәсәй юстиция министрының бойороғо буйынса, Башҡортостандың баш суд приставы итеп Илнур Мәхмүтов тәғәйенләнде. Был вазифала ул Дәүләт Думаһы депутаты итеп һайланған яҡташы Зариф Байғусҡаровты алмаштырҙы, тип хәбәр итә РБК-Өфө.

Илнур Мәхмүтов 1980 йылдың 5 октябрендә Күгәрсен районында тыуған. Башҡорт дәүләт университетының Стәрлетамаҡ филиалын «юриспруденция» һөнәре буйынса тамамлай. Хеҙмәт эшмәкәрлеген Федераль суд приставтары хеҙмәтендә Башҡортостандың Күгәрсен районы буйынса бүлегендә суд приставы-башҡарыусыһы вазифаһында башлай. Өфөнөң Калинин районы суд приставтары бүлегендә эшләй, Башҡортостандың баш суд приставы урынбаҫары була, Рәсәй Федераль суд приставтары хеҙмәтенең Мари Иле Республикаһы буйынса идаралыҡты етәкләй. 2013 йылдың октябренән алып – Удмурт Республикаһының баш суд приставы.

«Ҡаҙаныштары өсөн», III дәрәжә «Хеҙмәт өсөн» миҙалдары, Рәсәй Федерацияһы Юстиция министрлығының почет грамотаһы менән бүләкләнгән.